पिंपरी चिंचवडः पिंपरी चिंचवडमध्ये शंभराव्या अखिल भारतीय नाट्य संमेलनाचं आयोजन करण्यात आलेलं आहे. या संमेलनामध्ये रविवारच्या एका सत्रामध्ये राज ठाकरेंच्या प्रकट मुलाखतीचं आयोजन करण्यात आलेलं होतं.

''आता जर शरद पवार व्यासपीठावर आले तर मी वाकून त्यांना नमस्कार करेन. व्यासपीठावर बोलले जाणारे राजकीय विषय वेगळे असतात आणि एखाद्याच्या अनुभवाचा, वयाचा मान ठेवणं वेगळं असतं'' असं राज ठाकरे म्हणाले.

मराठी कलाकारांच्या मान-सन्मानावरुन बोलताना राज ठाकरे म्हणाले, एका कलाकाराने दुसऱ्या कलाकाराचा सन्मान केला पाहिजे. कोणाचं वय किती आहे, त्याचा अनुभव किती आहे.. यावरुन त्याचा मान ठेवला पाहिजे.

''तुम्ही चार भितींमध्ये एकमेकांना काहीही बोला. परंतु चारचौघांमध्ये एकमेकांचा सन्मान केला पाहिजे. सर म्हटलं पाहिजे किंवा पूर्ण नावाने एकमेकांना बोलले पाहिजे. नाट्य संमेलनाच्या निमित्ताने असा निश्चय करा.'' असं आवाहन राज ठाकरेंनी केलं.

काय म्हणाले राज ठाकरे?

• अरुण सरनाईक यांना अरु नावाने कुणी हाक मारल्याचं कधी ऐकलं नाही किंवा श्रीराम लागूंना शिरु नावाने कुणी कधी बोललं नाही. श्रीराम सर किंवा साहेब असंच म्हटलं गेलं.

• सर्व मराठी कलाकारांना विनंती आहे की, एकमेकांना मान द्या. एकमेकांना सर म्हटलं पाहिजे.

• अशोक सराफांना मामा का म्हणता? चार भिंतीमध्ये काय बोलायचं ते बोला.. परंतु जाहीरपणे मामा म्हणू नका. ते तुमचे सख्खे मामा आहेत का?

• शंभराव्या नाट्य संमेलनात शपथ घ्यायला पाहिजे की सर्वांना मान देत राहू आणि मान घेत राहू. हिंदी कलाकार आणि दाक्षिणात्य कलाकार एकमेकांना सर म्हणून आवाज देतात.

• राजकारणातही एकमेकांना मान दिला पाहिजे. शरद पवार ज्येष्ठ नेते आहेत. ते जर इथे आले तर मी त्यांना वाकून नमस्कार करेन.