सांगली : छत्रपती शिवरायांनी अफझलखानाचा कोथळा काढताना वापरलेली वाघनखे भारतात लवकरच येणार आहेत. तमाम भारतीयांसाठी ती प्रेरणादायी गोष्ट ठरेल, असं स्पष्ट मत सांस्कृतिक कार्य मंत्री सुधीर मुनगंटीवार (Sudhir Mungantiwar) यांनी व्यक्त केलं.

100 व्या नाट्यसंमेलनाचे (Natya Sammelan) नियोजित अध्यक्ष डॉ. जब्बार पटेल (Dr. Jabbar Patel) यावेळी उपस्थित होते. अखिल भारतीय मराठी नाट्य परिषदेतर्फे शंभराव्या अखिल भारतीय मराठी नाट्यसंमेलनाची (Akhil Bharatiya Natya Parishad) मुहूर्तमेढ नाट्यपंढरी येथील विष्णुदास भावे नाट्यविद्यामंदिरात रोवण्यात आली. या सोहळ्यात ते बोलत होते.

मुनगंटीवार पुढे म्हणाले, वनमंत्री असताना महाराष्ट्राचा साग आणि वाघ विविध माध्यमांतून जगभर नेला. इतकेच नव्हे तर बहुचर्चित अयोध्येतील राम मंदिराच्या मुख्य दरवाजाचे लाकूडही आपण दिल्याचं त्यांनी सांगितलं. अजित पवार (Ajit Pawar) अर्थमंत्री असले तरी त्यांच्याकडे कागदाच्या नोटा आमच्या जंगलातील लाकडापासूनच तयार होतात, मग तिकडे जातात, असंही ते म्हणाले.

विमानाचे उड्डाण वेळाने झाल्याने कार्यक्रमाला विलंब झाल्याचे सांगत प्रशांत दामले यांनी मुनगंटीवार पहाटे चारपासून सांगलीला येण्यासाठी तयार होते. विमानात त्यांनी दहा-दहा मिनिटांच्या डुलक्या काढल्या. अशा डुलक्या काढल्यास 24 तासही कार्यरत राहण्याचा विश्वास मुनगंटीवार यांना असल्याचे दामले म्हणाले.