नवी मुंबई: राज्यात अपघातांचे प्रमाण वाढत आहे. असाच एक अपघात नवी मुंबईतील कळंबोलीमध्ये घडला आहे. या घटनेत एका तरुणीचा दुर्दैवी मृत्यू झाला आहे. कळंबोलीमध्ये तेलाचा कंटेनर पलटी होऊन अपघात झाला. यानंतर टॅंकरमधील तेल मोठ्या प्रमाणात रस्त्यावर सांडले होते. याचेवळी या तेलावरून दुचाकी घसरली आणि तरुणीने नाहक जीव गमावल्याची दुर्दैवी घटना घडली. या घटनेनं परिसरात हळहळ व्यक्त होत आहे.

मिळालेल्या माहितीनुसार, अपघातात मृत्यू झालेल्या तरुणीचे नाव राजनंदिनी जाधव (19) असं आहे. नवी मुंबईतील कळंबोली सर्कल येथे एक तेलाचा टँकर पलटी झाला होता. त्यानंतर टॅंकरमधील तेल रस्त्यावर सांडले होते. तेवढ्यातच ही तरुणी दुचाकीवरून तेथून जात होती. रस्त्यावर सांडलेल्या तेलावरून तिची दुचाकी घसरली. या घटनेत तरुणीला गंभीर दुखापत झाली होती. त्यामुळे राजनंदिनी जाधवचा दुर्दैवी मृत्यू झाला. घटनेनंतर नागरिकांनी मोठी गर्दी केली होती. या घटनेची माहिती पोलिसांना देण्यात आली.

घटनेची माहिती कळताच पोलिसांनी घटनास्थळी धाव घेतली. वाहतूक पोलिसांनी घटनास्थळी धाव घेऊन तरुणीचा मृतदेह ताब्यात घेतला. त्यानंतर तरुणीचा मृतदेह शवविच्छेदनासाठी रुग्णालयात पाठवला. दरम्यान पलटी झालेला टँकर बाजूला करण्याचे काम सुरू आहेत. त्यानंतर कळंबोळी अग्निशमन दलालाही पाचारण करण्यात आले होते. त्यांनी फोमच्या सहाय्याने रस्ता धुतला. यामुळे रस्त्यावर सांडलेले तेल कमी झाले. मात्र या घटनेनं परिसरात मोठ्या प्रमाणात वाहतूक कोंडी झाल्याचे दिसून आले. तसेच वाहतूक हळूहळू सुरळीत करण्याचे काम प्रशासनाकडून करण्यात येत आहेत.