कोल्हापूर : कोल्हापूर उत्तर मतदारसंघाचे आमदार व यशस्वी उद्योगपती चंद्रकांत पंडित जाधव (Chandrakant Jadhav) यांचे आज हैदराबाद (Hyderabad) येथे निधन झाले. त्यांच्या या निधनाबद्दल राष्ट्रवादी काँग्रेसचे प्रवक्ते नवाब मलिक (Nawab Malik) यांनी दुःख केलंय.

मलिकांनी आमदार जाधव यांना ट्विटव्दारे श्रद्धांजली अर्पण केलीय. आमदार जाधव यांचे दुःखद निधन झाले, ही बातमी अत्यंत वेदनादायी आहे. आम्ही सर्वजण त्यांच्या कुटुंबीयांच्या दुःखात सहभागी आहोत, असं त्यांनी म्हंटलंय. 2019 मध्ये झालेल्या विधानसभेच्या निवडणुकीत (Assembly Election) जाधव यांनी माजी आमदार राजेश क्षीरसागर (Rajesh Kshirsagar) यांचा पराभव केला होता.

मनमिळावू व कार्यतत्पर अशी ओळख असणाऱ्या श्री जाधव यांच्या मृत्यूने उद्योगासह राजकीय क्षेत्रात हळहळ व्यक्त केली जात आहे. गेल्या दीड वर्षापासून त्यांना दोन वेळा कोरोनाची लागण झाली होती. त्यातून ते ठणठणीत बरे झाले होते. मात्र, काही दिवसांपूर्वी त्यांना पुन्हा त्रास होऊ लागल्याने हैदराबाद येथील रुग्णालयात दाखल केले होते. मात्र उपचार सुरू असताना त्यांचे निधन झाले.