क्रूझ ड्रग पार्टीनंतर राज्यात मोठं राजकीय घमासान सुरु झालं. राज्याचे अल्पसंख्यांक मंत्री नवाब मलिक यांनी एनसीबीने केलेल्या या कारवाईवर अनेक प्रश्न उपस्थित केले. तसंच वानखेडे यांना वर्षभरात जेलमध्ये पाठवणार असल्याचे सांगितले. त्यावर आता भाजपनेते राधाकृष्ण विखे पाटील यांनी नवाब मलिक यांचा राजीनामा घेण्याची मागणी केली आहे. महाविकास आघाडी सरकारमध्ये काही चाड शिल्लक असेल तर त्यांनी मंत्री नवाब मलिकांचा राजीनामा घ्यावा असं म्हणत विखेंनी देखील या वादात उडी घेतली आहे.

नवाब राज्याचे मुख्यमंत्री उद्धव ठाकरे आणि त्यांच्या सरकारमध्ये काही चाड शिल्लक असेल तर त्यांनी मलिक यांचा राजीनामा घ्यावा. तसंच ते पुढे असंही म्हणाले की, सरकारी अधिकाऱ्यांना धमक्या देणारा कॅबिनेटमंत्री आपण कधीही पाहिला नाही.

कोरोना काळात सिनेतारकांसोबत वानखेडे आणि त्यांचे कुटुंबीय हे मालदीवमध्ये होते असा आरोप मलिक यांनी केला होता. नवाब मलिक यांनी केलेल्या या आरोपानंपतर एनसीबी अधिकारी समीर वानखेडे यांनी त्यावर प्रतिक्रीया दिली आहे. 'नवाब मलिक यांनी माझ्यावर केलेले आरोप चुकीचे आहेत. सेवेत रुजू झाल्यापासून मी कधीच दुबईला गेलो नाही. मी माझ्या बहिणीसह मालदीवला गेलो नाही. मी सरकारकडून अधिकृत रजा घेतली आणि माझ्या स्वतःच्या पैशाने माझ्या कुटुंबासह सहलीला गेलो. माझी बहीण स्वतंत्रपणे मालदीवला गेली होती. मलिक वारंवार माझ्या कुटुंबातील महिलांना लक्ष्य करत आहे, ही बाब चुकीची आहे. यासाठी मी लवकरच न्यायालयात दाद मागणार असून कायदेशीर मार्ग अवलंबणार असल्याचं समीर वानखेडे यांनी सांगितलं.