राष्ट्रवादीचे काँग्रेसचे प्रवक्ते आणि मंत्री नवाब मलिक यांनी आर्यन खान प्रकरणात आणखी एक गौप्यस्फोट केला आहे. मलिक आज सकाळी 10 वाजता पत्रकार परिषद घेणार आहेत. मात्र, याआधीच त्यांनी एक ऑडिओ क्लिप ट्वीट केली आहे. यामध्ये एनसीबीचे अधिकारी व्हीव्ही सिंग आणि सॅम डिसूझा यांच्यातील संभाषण आहे, असा दावा मलिक यांनी केलाय. या संभाषणात सॅम या अधिकाऱ्याला भेटण्याचा दिवस ठरवत आहे.

दोघांमधील संभाषणाचा मराठी सारांश

सॅम - हॅलो... सर सॅनविल बोलतोय!

व्हीव्ही सिंग - कोण सॅनविल?

सॅम - सर, तुम्ही एक नोटिस पाठवली आहे मला...

व्हीव्ही सिंग - अच्छा, सॅनविल.. वांद्र्यात राहतो ना तू?

सॅम - हो सर... मी जरा बाहेर होतो. माझी तब्येत बरी नाही.

व्हीव्ही सिंग - मग आता परत ये!

सॅम - मी अजून पोहोचलेलो नाही सर. तब्येत अजूनही खराब आहे. मला आणखी एक दिवस हवा आहे.

व्हीव्ही सिंग - मग कधी येशील?

सॅम - सर, मी सोमवारी येऊ का?

व्हीव्ही सिंग - सोमवारी नको, मग बुधवारी ये. सोमवारी मी नाहीय.

सॅम - ओके सर.

व्हीव्ही सिंग - आणि ऐक. येताना मोबाईल घेऊन ये! मला आता जास्त नाटकं नको आहेत. माझ्याकडे तुझा आयएमआय नंबर आहे. तोच फोन घेऊन ये. मी तुला आधीच वॉर्निंग देतोय.

सॅम - ओके, सर मी तसं नाही करणार!

व्हीव्ही सिंग - ओके, मग ये बुधवारी!

यासंभाषणानंतर आता आर्यन खान प्रकरणाने पुन्हा नवा ट्विस्ट घेतला आहे. नवाब मलिक यांनी संभाषण व्हायरल करण्यासोबत पत्रकार परिषद घेतली. यामध्ये त्यांनी समीर वानखेडे यांचे भाजपच्या काही नेत्यांशी असलेले संबंध उघडकीस आणण्याचा प्रयत्न केला. यामध्ये भाजपचा माजी युवा मोर्चा अध्यक्ष मोहित कुंबोज हाच या संपूर्ण प्रकरणाचा मास्टरमाईंड असल्याचं त्यांनी सांगितलं. तसेच व्हि व्हि सिंग आणि सॅम यांच्या संभाषणावर प्रकाश टाकला. सॅम याचे आधीच्या एका प्रकरणात असलेल्या संबंधांचाही मलिकांनी खुलासा केलाय.