मुंबई- राष्ट्रवादी काँग्रेसच्या बैठकीत अजित पवार यांनी कार्यकर्ते आणि पदाधिकाऱ्यांना संबोधित केले. यावेळी ते उपस्थितांना म्हणाले की, 'विजयाचा उन्माद होऊ द्यायचा नाही, पराभवाने खचून जायचं नाही. सर्वांनी मनापासून काम केलं आहे. राजकीय निर्णय घेतल्यानंतर ही पहिलीच निवडणूक होती. २०१९ मध्ये विरोधकांना ७ जागा मिळाल्या होत्या, त्यामुळे आपल्याला जास्त जागा मागता आल्या नाहीत.'

लोक देतील तो कौल मान्य करून आपण पुढं जायला हवं. अशी भूमिका सर्वांनी मान्य करायला हवी. आपण वेगळा निर्णय घेतल्यानंतर ही पहिलीच निवडणूक होती. मागच्यावेळी 41 जागा भाजप युतीच्या होत्या. तर विरोधक 7 जागेवर होते.त्यामुळं आपल्याला यंदा जागा कमी मिळाल्या. साताऱ्याला राज्यसभेची जागा आपण देणार आहोत. इतरांनी मागणी करू नये, असं अजित पवार यांनी स्पष्ट केलं.

निवडणुका म्हणजे सत्तेत येण्याचं साधन आहे असं आपण मानत नाही. निवडणुका या पाच वर्षांच्या कामाचे मूल्यमापन लोक करतात आणि आपल्याला कौल देतात. कार्यकर्ता पक्षाचा कणा असतो. आपण नवीन राजकीय भूमिका घेतली आहे. आपण विधानसभेत ५४ निवडून आलो होतो. जागेबाबत काळजी वाटणं साहजिक आहे. पण, काळजी करण्याची गरज नाही. सर्वांचा मानसन्मान ठेवला जाईल, असं अजित पवार म्हणाले.

नाशिकच्या जागेच्या संदर्भात अनेक आमदार आपल्या आणि भाजपच्या विचाराचे होते. त्यांनी आपल्याला बोलून दाखवलं. थोडा विलंब झाला ही गोष्ट मी नाकारणार नाही. येत्या १० जूनला आपल्याला २५ वर्ष पूर्ण होत आहेत. आज ज्यांनी पक्षात प्रवेश केला आहे. ते आल्याचा आपल्या पक्षाला नक्कीच फायदा होईल, असं अजित पवार म्हणाले.

धीरज शर्मा यांच्यावर आधीच जबाबदारी होती. त्यांच्यासोबत असंख्य सहकाऱ्यांनी आज प्रवेश केला आहे. 10 जून 1999 साली स्वाभिमानातून आपण पक्ष स्थापन केला. आपण परदेशी मुद्दा समोरं ठेऊन पक्ष काढला आणि 4 महिन्यात त्याचं मुद्द्याला बाजूला ठेवून आपण सत्तेत गेलो. नंतरच्या काळात काही जणांचं पक्षात महत्त्व वाढल आहे. प्रत्येकाला मानसन्मान हवा असतो. कार्यकर्ता महत्त्वाचा असतो, असंही ते म्हणाले.