उपमुख्यमंत्री अजित पवार यांच्या उपस्थित आज, 16 सप्टेंबर रोजी अनेक दिग्गजांचा राष्ट्रवादी काँग्रस पक्षामध्ये प्रवेश होणार आहे. राष्ट्रवादी काँग्रस पक्षाच्या मुंबई कार्यालयात प्रवेश सोहळा रंगणार आहे. यावेळी राष्ट्रवादीचे दिग्गज नेतेही उपस्थित राहण्याची शक्यता वर्तवण्यात येत आहे. आगामी काळात होणाऱ्या निवडणुकीआधी राष्ट्रवादी काँग्रस पक्षातील इनकमिंग सुरु झाली आहे.

लावणी सम्राज्ञी सुरेखा पुणेकर यांच्यासह शांताबाई फेम संजय लोंढे, गायिका डॉ. देवयानी बेंद्रे यांच्यासह सोलापूरातील एका दिग्गज नेत्याचाही राष्ट्रवादीत प्रवेश होणार आहे. आज, दुपारी अजित पवार यांच्या उपस्थित प्रवेशसोहळा रंगणार आहे.

आतापर्यंत कलेची सेवा केली आहे. आता राजकारणात जनतेची सेवा करायची आहे. महिलांचे प्रश्न सोडवायचे आहेत. गोरगरिबांचे प्रश्न सोडवायचे आहेत. त्यामुळेच 16 सप्टेंबर रोजी उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये प्रवेश करणार आहे, अशी प्रतिक्रिया सुरेखा पुणेकर यांनी दिली.

शेट्टींच्या जागी पुणेकर?

विधान परिषदेच्या 12 जागांची यादी राज्यपाल यांनी अद्याप मंजूर केलेली नाही. सुत्रांच्या हवाल्याने मिळालेल्या वृत्तानुसार, राजू शेट्टी यांच्या नावावर राज्यपाल भगतसिंग कोश्यारी यांनी आक्षेप घेतला आहे. राष्ट्रवादीने आपल्या कोट्यातून राजू शेट्टी यांचं नाव दिलं होतं. राज्यापालांच्या आक्षेपानंतर राष्ट्रवादीने राजू शेट्टी यांचा पत्ता कट केल्याचं बोललं जात आहे. त्याजागी आता सुरेखा पुणेकर यांची वर्णी लागणार का? अशी चर्चा आता रंगली आहे