नवी दिल्लीः राष्ट्रवादी काँग्रेस पक्ष नेमका कुणाचा? या वादावर केंद्रीय निवडणूक आयोगामध्ये शुक्रवारपासून सुनावणी सुरु झाली आहे. सुनावणीच्या पहिल्याच दिवशी स्वतः शरद पवार आयोगाच्या कार्यालयात उपस्थित होते. दुपारी ४ वाजता या सुनावणीला सुरुवात झालेली होती.

निवडणूक आयोगामध्ये सुरु असलेल्या सुनावणीमध्ये दोन्ही गटांनी युक्तिवाद केला. राष्ट्रवादी पक्षाचा राष्ट्रीय दर्जा गेल्याने आमदारांच्या संख्येवरच पक्ष कुणाचा हे ठरेल, असं अजित पवार गटाचं म्हणणं होतं. तर देशभरातील पक्षसंघटना शरद पवार यांच्यामागे असल्याचं पवार गटाने स्पष्ट केलं.

मीडिया रिपोर्टनुसार राष्ट्रवादी काँग्रेसचं पक्षचिन्ह आयोगाकडून गोठवलं जावू शकतं. त्यामुळे शरद पवार गटाने पक्ष कुणाचा हा निर्णय होईपर्यंत चिन्ह गोठवू नये, अशी भूमिका घेतली होती. 'एबीपी माझा'ने हे वृत्त दिले आहे.

दुसरीकडे अजित पवार गटाने म्हटलं की, ज्याप्रमाणे शिवसेनेला पक्षचिन्ह आणि नाव दिलं तसंच आम्हालाही द्या.

अजित पवार यांच्यासह ९ आमदारांवर कारवाई करावी, असं एक पत्र विधानसभा अध्यक्षांना देण्यात आलेलं होतं. ते पत्र निवडणूक आयोगामध्ये शरद पवार गटाकडून सादर करण्यात आलं. मात्र अशी मागणी करणारं पत्र बेकायदेशीर आहे, कारण मुख्य प्रतोद आमच्यासोबत आहेत, असा मुद्दा अजित पवार गटाने प्रस्तूत केला.

दरम्यान, शुक्रवारची सुनावणी संपलेली असून पुढची सुनावणी येत्या सोमवारी दुपारी ४ वाजता ठेवण्यात आलेली आहे. सुनावणीनंतर वकील अभिषेक मनु सिंघवी म्हणाले की, राष्ट्रवादीचे ९९ टक्के कार्यकर्ते शरद पवार यांच्यासोबत असून अजित पवार गटाची कागदपत्रं ही खोटी आहेत. आयोगासमोर आम्ही सक्षमपणे बाजू मांडत आहोत, असं त्यांनी सांगितलं.