मुंबई : विधानपरिषदेच्या निवडणुका पार पडल्यानंतर राज्यात कालपासून राजकीय भूकंपाचे वारे वाहू लागले आहे. शिवसेना नेते एकनाथ शिंदे (Eknath Shinde) यांच्यासह साधारण 46 आमदार फुटल्याच्या मार्गवर आहेत. त्यात राष्ट्रवादीचे नेते छगन भुजबळ (Chagan Bhujbal) यांनी मोठं विधान केले आहे. राजकारणी आहोत त्यामुळे सर्वच पक्षांनी नेहमी निवडणुकांसाठी तयार राहिले पाहिजे असे म्हटले आहे. यावेळी भुजबळ यांनी नरेंद्र मोदींबाबत भाष्य केले. ते म्हणाले की, पंतप्रधान नरेंद्र मोदी (PM Modi) तुकारामांच्या भेटीला देहुत आले आणि एकनाथाला घेऊन गेले असेही छगन भुजबळ म्हणाले. (Chagan Bhujbal On Maharashtra Government)

आमदारांची नाराजी दूर करण्यासाठी सेनेच्या वतीने प्रयत्न सुरू आहेत. संजय राऊत (Sanjay Raut) यांनीही एकनाथ शिंदेंना फोन कॉल केल्याचं सांगितलं. दोघांमध्ये एक तास चर्चा झाल्याची माहिती राऊतांनी दिली. (Maharashtra Political Crisis) सध्या राजकीय घडामोडींचा प्रवास विधानसभा बरखास्त होण्याच्या दिशेने असल्याचं ट्वीट राऊत यांनी केलं आहे. यानंतर राज्यात मध्यावधी निवडणुका लागणार असल्याचं स्पष्ट झालंय.

राज्यात नवं सरकार येणार; नितेश राणेंचं ट्वीट

संजय राऊत यांना संविधान आणि त्यातील तरतुदी कळण्याचा प्रश्नच निर्माण होत नाही. निवडणुका होणार, असे घाबरवून आमदारांना धमक्या काय देताय? सरकार वाचविण्यासाठी? चिंता नको, महाराष्ट्रात नवे सरकार येणार, विकास पर्व पुन्हा नव्याने सुरू होणार! असे ट्वीट नितेश राणेंनी (Nitesh Rane) केलं आहे.

काँग्रेसचा एकही आमदार फुटलेला नाही - थोरात

या सर्व घडामोडींमध्ये काँग्रेसचे सर्वच्या सर्व आमदार पक्षासोबतच असून, एकही आमदार फुटला नसल्याचा दावा काँग्रेसचे नेते बाळासाहेब थोरात यांनी केला आहे. तसेच काँग्रेसमध्ये कुठलीही अडचण नसून, सर्व आमदारांना मुंबई दाखल होण्यास सांगण्यात आले आहे. दरम्यान, एक वाजता मंत्रिमंडळाची बैठक पार पडणार असून, यामध्ये मविआ सरकारविरोधात अविश्वास ठराव आणण्याची शक्यता वर्तवली जात आहे. मात्र, याबातच्या बैठकीचा अजेंडा अद्याप तयार झालेला नसल्याचे सांगितले जात आहे.