Supriya Sule : राष्ट्रवादी काँग्रेसचे नेते शरद पवार यांनी मंगळवारी आपल्या पुस्तक प्रकाशन सोहळ्यात पक्षाच्या अध्यक्षपदावरुन निवृत्तीची घोषणा केली आणि त्यानंतर एकच खळबळ उडाली. राष्ट्रवादीच्या कार्यकर्त्यांनी त्यांच्या या निवृत्तीला विरोध दर्शवला तरीसुद्धा पवार त्यांच्या निवृत्तीवरच्या घोषणेवर ठाम राहिले.

आता राष्ट्रवादीचा नवा अध्यक्ष कोण? अशा चर्चा रंगल्या आहेत. यात शरद पवारांची लेक खासदार सुप्रिया सुळेंचं नाव समोर येत आहे. सुप्रिया यांचं राजकारणी आयुष्य सर्वांनाच माहिती आहे पण तुम्हाला त्यांच्या वैयक्तिक आयुष्याविषयी माहिती आहे का? सुप्रिया सुळे यांची लव्हस्टोरी तुम्हाला माहिती आहे का? आज आपण त्या विषयीच जाणून घेणार आहोत. (ncp leader sharad pawar daughter Supriya Sule and sadanand sule love story)

शरद पवार यांची लाडकी मुलगी सुप्रिया सुळे ही तिच्या वडिलांसारखीच राजकारणात सक्रिय आहे. सुप्रिया सुळे यांचा जन्म ३० जुन १९६९ रोजी पुण्यात झाला. पुण्याच्या सेंट कोलंबस स्कूलमधून त्यांनी शालेय शिक्षण पुर्ण केले. त्यानंतर त्यांनी मायक्रोबायोलॉजी विषयात मुंबईच्या जय हिंद महाविद्यालयातून बी.एस.सी. पूर्ण केली.

बी.एस.सी पुर्ण केल्यानंतर त्या पुण्यात आपल्या काकांकडे आल्या आणि त्यांनी एका वृत्तपत्रात काम करू लागल्या. ही नोकरी करताना एका जवळच्या फ्रेंडच्या पार्टीमध्ये सुप्रियाला एक व्यक्ती भेटले. या व्यक्तीचं नाव होतं सदानंद सुळे.

सदानंद सुळे हे महिंद्रा अँड महिंद्राचे माजी संचालक भालचंद्र सुळे आणि शशि भट्ट यांचा मुलगा आहे. शशि भट्ट या एक बॅडमिंटन खेळाडू राहल्या. त्या भारतीय सिविल सेवा अधिकारी एम डी भट्ट यांची मुलगी आहे.

सदानंद यांना सुप्रिया या पहिल्या नजरेतच आवडल्या. त्यांच्यात सुरवातीला मैत्री झाली आणि नंतर ते एकेमेकांच्या प्रेमात पडले. एक वेळ अशी आली की दोघांना वाटलं की लग्न करावं त्यामुळे दोघांनीही आपआपल्या घरी सांगितले आणि लग्न ठरले. अशाप्रकारे सुप्रिया यांना सदानंद सुळे यांच्या रुपात त्यांचा जीवनसाथी मिळाला.

लग्नानंतर सुप्रिया काही वर्षांसाठी अमेरिकेला गेल्या आणि त्यांनी बर्कले यूनिवर्सिटीमध्ये वॉटर पोल्यूशनला घेऊन एक रिसर्च पेपरही लिहला ज्याची नंतर भारतात खूप चर्चा झाली होती.
अमेरिकेनंतर सिंगापुर आणि जार्जियामध्ये सदानंद यांनी नोकरी केली तेव्हा सुप्रिया सुळे त्यांच्यासोबत होत्या. त्यानंतर दोघेही भारतात परतले आणि सुप्रिया राजकारणात सक्रिय झाल्या. त्यांना विजय सुळे आणि रेवती सुळे असे दोन मुलं आहे.