मुंबईः मुख्यमंत्री एकनाथ शिंदे यांनी शिवसेनेतून बंड करत भाजपला सोबत घेऊन सरकार स्थापन केलं. त्यामुळे शिवसेना आमदारांवर अपात्रतेची कारवाई करावी, अशी याचिका विधानसभा अध्यक्षांकडे प्रलंबित आहे. त्या प्रकरणात तारखांवर तारखा सुरु आहेत. आता राष्ट्रवादी काँग्रेसच्या आमदार अपात्रता प्रकरणाच्या सुनावणीचे वेळापत्रक ठरले आहे.

२ जुलै रोजी अजित पवारांनी पक्षातल्या आमदारांना सोबत घेऊन मंत्रिपदाची शपथ घेतली. अजित पवारांसह अजित पवार गटाचे ९ आमदार मंत्री झाले. शिवाय चाळीसपेक्षा जास्त आमदार अजित पावारांसोबत गेले. त्यामुळे शरद पवार गटाकडून विधानसभा अध्यक्षांकडे आमदार अपात्रता प्रकरणासाठी याचिक दाखल करण्यात आली. या याचिकेवर सुनावणीसाठी १२ दिवसांचे वेळापत्रक निश्चित करण्यात आले आहे.

राष्ट्रवादी आमदार अपात्रता सुनावणीचे वेळापत्रक

• ६ जानेवारी - राष्ट्रवादीचे दोन्ही गटांमध्ये याचिका आणि त्यावरील उत्तराची कागदपत्रे एकमेकांना सोपविली जातील.

• ८ जानेवारी - याचिकेसाठी अधिकची, अतिरिक्त माहिती जोडण्यासाठी वेळ

• ९ जानेवारी - फाईल्स किंवा अधिकची, अतिरिक्त कागदपत्रे पटलावर आणणे. मात्र, ९ तारखेनंतर ऐनवेळी कोणतीही नवी कागदपत्रे जोडता येणार नाही. अशा मागणीचा विचार केला जाणार नसल्याचे स्पष्टपणे बजावण्यात आले आहे.

• ११ जानेवारी - याचिकेशी संबंधित कागदपत्रांची पाहणी आणि पडताळणी. पहिल्या दिवशी शरद पवार गट अजित पवार गटाकडून सादर झालेली कागदपत्रे तपासेल.

• १२ जानेवारी - याचिकेशी संबंधित कागदपत्रांची पाहणी आणि पडताळणीचा दुसरा दिवस. अजित पवार गटाकडून शरद पवार गटाने सादर केलेल्या कागदपत्रांची पाहणी केली जाईल.

• १४ जानेवारी - सुनावणीच्या कामकाजात कागदपत्रांचा समावेश करण्यासाठी किंवा एखादे वगळण्यासाठी अर्ज दाखल करण्याचा दिवस. (NCP MLA disqualification hearing schedule)

• १६ जानेवारी - विधानसभा अध्यक्ष नार्वेकरांसमोर पहिली प्रत्यक्ष सुनावणी. सुनावणीचे विषय नक्की केले जातील.

• १८ जानेवारी - प्रतिज्ञापत्र सादर करणे

• २० जानेवारी - अजित पवार गटाच्या साक्षीदारांच्या उलटतपासणी होतील

• २३ जानेवारी - शरद पवार गटाच्या साक्षीदारांच्या उलटतपासणी होतील

• २५ आणि २७ जानेवारी - राष्ट्रवादीच्या दोन्ही गटांचे अंतिम युक्तीवाद संपन्न होतील