राष्ट्रवादीचे नेते व शिरूरचे लोकसभा मतदार संघाचे खासदार डॉ. अमोल कोल्हे हे लसींचे दोन डोस घेवूनही कोरोना बाधित झाले आहेत. कोरोना उपचारासाठी अनेक सुसज्ज रुग्णालये उपलब्ध असतानाही त्यांनी महाराष्ट्र शासनाच्या सार्वजनिक आरोग्य व्यवस्थेवर विश्वास दाखवत शासकीय रुग्णालयाचाच पर्याय निवडला आहे.

कोरोना रिपोर्ट पॉझिटिव्ह आल्यानंतर खासदार डॉ. अमोल कोल्हे यांनी याबाबतची माहिती फेसबुक पोस्टद्वारे दिली आहे. त्यांनी केलेल्या पोस्टमध्ये म्हटले आहे की, दोनवेळा कोरोना प्रतिबंधक लस घेऊन सुद्धा माझी कोरोना टेस्ट पॉजिटीव्ह आली आहे. त्यामुळे कोरोनाचा धोका पूर्णपणे टळलेला नाही याची प्रचिती स्वत: मला आलेली आहे. हा डेल्टा व्हेरीयंट असू शकतो. कारण तो लस घेतल्यानंतरची प्रतिकारशक्ती सुद्धा भेदू शकतो. महाराष्ट्र शासनाची आरोग्य व्यवस्था सक्षम असून माझा त्यावर विश्वास आहे. त्यामुळे मी कोरोना उपचारासाठी मुंबई महापालिकेच्या 'सेव्हेन हिल्स रुग्णालयात' उपचारासाठी दाखल झालो आहे. लसीचे दोन डोस घेतले म्हणजे धोका टळला असे समजून गाफिल राहू नका. सर्वांनी कोरोनाचे नियम निर्बंध काटेकोरपणे पाळा. असे कळकळीचे आवाहन करीत त्यांनी विविध माध्यमातून काळजी व्यक्त करणाऱ्या व लवकर बरे होण्यासाठी शुभेच्छा देणाऱ्या हितचिंतकांचे आभारही मानले आहेत.