मुंबई - अजित पवार गटाचे नेते छगन भुजबळ यांनी आज सभेत जोरदार भाषण करत आपल्या मनातील खदखद व्यक्त केली. बडव्यांनी पांडुरंगाला भेटू दिलं नाही, असंही ते म्हणाले. त्याला जयंत पाटलींना प्रत्युत्तर दिलंच. शिवाय शरद पवारांनी देखील छगन भुजबळांंबाबत खंत व्यक्त केली.

शरद पवार म्हणाले की, त्यांना माहित आहेत, आपलं नाणं खणखण वाजत नाही, त्यामुळे माझे फोटो वापरण्यात येतात. अनेकांनी सांगितल, की पांडुरंगाला बडवे येऊ देत नाही. मात्र पांडुरंगाच्या दर्शनाला या देशात कोणीच थांबवू शकत नाही. वारीला लोक जातात. पांडुरंगाच्या दर्शन घेण्यासाठी पंढरपुरात पोहोचल्यावर बाहेरून दर्शन घेतात, आणि घराकडे निघतात. मात्र आता आमच्याकडे दुर्लक्ष झाल्याचं सांगण्यात येत.

पवार पुढं म्हणाले की, भुजबळ तुरुंगात गेले, तेव्हा त्यांच्यासाठी जे काही प्रयत्न करायचे ते केले. ते बाहेर आल्यानंतर काही लोकांनी सांगितलं, भुजबळ तुरुंगात राहिले, त्यांना संधी देऊ नका. पण मी म्हटलं, ते चालणार नाही. त्यांच्यावर अन्याय झाला, असं मला वाटतं. त्या अन्यायामुळे ते तुरुंगात गेले. अशा वेळी त्यांच्यामागे पक्ष उभा राहणार. त्यांना तिकीट दिलं. सरकार आलं. पक्षातील दोघांची शपथविधीसाठी नावे द्यायची होती. त्यात पहिलं नाव भुजबळांचं दिलं.

मला आठवतं, सकाळी मला फोन आला. ते म्हणाले काय चाललं. मी म्हटलं मलाही माहित नाही. ते म्हणाले मी जातो, बघतो आणि तुम्हाला कळवतो. त्यानंतर ३ वाजता पाहिलं मी त्यांनी शपथच घेतली. कोणा काय करेल याचा नेम नाही, असंही पवार म्हणाले. राज्यकर्ते किमान राज्य एकत्र ठेवणारे असावे, असंही पवार म्हणाले.