राष्ट्रवादी कॉंग्रेसमध्ये कोणतीही फूट पडलेली नाही, अजित पवार हे आमचेच नेते आहेत असं सुप्रिया सुळे यांनी वक्तव्य केलं होतं. यानंतर शरद पवार यांनीही आज (२५ ऑगस्ट) सकाळी बारामती येथे बोलताना सुप्रिया सुळेंच्या या वक्तव्याला दुजोरा दिला होता. दरम्यान साताऱ्यात बोलताना मात्र त्या वक्तव्यावर स्पष्टीकरण देत, मी तसं बोललोच नाही असे शरद पवार म्हणाले आहेत.

शरद पवार म्हणाले की, पहाटेचा शपथविधी झाला त्यावेळी आम्ही त्यांना संधी दिली. आता परत संधी मागायची नसते आणि मागीतली तर ती द्यायची नसते. सध्या आमची भूमिका दुसरी आहे. आमचे नेते असं मी म्हणालो नाही. सुप्रिया अजित पवारांना नेते म्हणाली. सुप्रिया त्यांची धाकटी बहिण आहे. त्याच्यामुळे बहिण भावांच्या नात्यात बोललेल्या गोष्टीचे राजकीय अर्थ काढण्याची गरज नाही. आज जी भूमिका आमच्या सहकाऱ्यांनी घेतली ते आमचे नेते नाहीत असेही शरद पवारांनी स्पष्ट केलं.

नेमकं काय झालं होतं?

सुप्रिया सुळे राष्ट्रवादी कॉंग्रेसमध्ये कोणतीही फूट पडलेली नाही, अजित पवार हे आमचेच नेते आहेत, असं म्हणतात असा प्रश्न शरद पवारांना बारामती येथे विचारण्यात आला होता. यावर बोलताना शरद पवार म्हणाले की- आहेतच, त्यात काही वादच नाही. फूट पडणे याचा अर्थ काय? पक्षात फूट कधी होते, जर पक्षातच एक मोठा वर्ग वेगळा झाला देशपातळीवर, आज तशी स्थिती येथे नाही. काही लोकांनी पक्ष सोडला, वेगळी भूमिका घेतली लोकशाहीमध्ये तोत्यांचा अधिकार आहे. वेगळा निर्णय घेतला म्हणून फूट म्हणण्याचं काही कारण नाही हा त्यांचा निर्णय आहे असे शरद पवार म्हणाले.