पुणे - शिवसेना आणि एकनाथ शिंदे गट यांच्यातील टीका टिप्पणी आणखी तीव्र होत चालली आहे. त्यातच आज पुरंदर येथे शिवसेना पदाधिकाऱ्यांचा मोळावा आयोजित करण्यात आला होता. यावेळी शिवसैनिकांनी आपली खंत बोलून दाखवत नेतृत्वाची पाठिवर थाप हवी, अशी मागणी नेत्यांसमोर केला. तर शिवसेना नेत्या डॉ. निलम गोऱ्हे यांनी विधान परिषद निवडणुकीच्या दिवशी घडलेल्या घडामोडींचा गौप्यस्फोट केला. यावेळी आमदार सचिन आहिर यांनी बडखोर आमदांरावर टीका केली.

दरम्यान कार्यकर्त्यांनी नेत्यांसमोर मनातील खंत बोलून दाखवत मातोश्रीचे दरवाजे आमच्यासाठी बंद असतात, अशी तक्रार केली. आम्ही शिवसेनेसोबतच आहोत. आमच्या पाठिवर थाप द्या, आणि उद्धव ठाकरे यांची भेट घालून द्या, अशी मागणी शिवसैनिकांनी केली.

यावेळी निलम गोऱ्हे यांनी शिवसैनिकांना संबोधित केलं. त्या म्हणाल्या की, विधान परिषदेच्या निवडणूकी वेळी दुपारी लक्षात आलं होतं की, काही तरी विचित्र चाललंय. मतदानाची घाई करत होते. जेवणाची घाई करत होते. उद्धव ठाकरे येणार म्हटलं तरी थांबायला तयार नव्हते. घाईने बाहेर पडले, गाडीत बसले आणि सामान मागवलं. त्याचवेळी बहुतेक जणांना सांगितलं होतं, शिंदे मुख्यमंत्री होणार,असा गौप्यस्फोट निलम गोऱ्हे यांनी केला.

सध्या शिवसेना कोणाची यावरून राजकारण तापल आहे. तर दुसरीकडे निवडणूक आयोगाने देखील एकनाथ शिंदे गट आणि उद्धव ठाकरेंना शिवसेनेची मालकी कोणाकडे याचे पुरावे सादर करण्याचे निर्देश दिले आहेत. त्यामुळे शिवसेनेकडून राज्यभरातील पदाधिकांऱ्यांकडून प्रतिज्ञापत्र भरून घेतले जात आहे.