कोल्हापूर : राज्य सरकारविषयी केंद्राची भूमिका कर्मठ आहे अशी टीका विधान परिषदेच्या उपसभापती डॉ. नीलम गोऱ्हे (Neelam Gorhe) यांनी पत्रकारांशी बोलताना केली. महिला अत्याचारात वाढ होत असून दोषसिद्धीचे प्रमाण वाढण्यासाठी सरकार प्रयत्नशील असल्याची माहितीही त्यांनी दिली.

डॉ. गोऱ्हे म्हणाल्या, "सरकार कोणाचेही असो महिलांवरील अत्याचारांच्या नोंदीत वाढ होत आहे. शक्ती व सीसीटीएनएसद्वारे दोषसिद्धीचे प्रमाण वाढविण्यासाठी सरकार प्रयत्न करत आहे. त्याचबरोबर अशा घटना घडू नयेत, यासाठी प्रत्येक जिल्ह्यात जाऊन आढावा घेत आहे. त्याबाबत केलेल्या शिफारशीही सरकार विचारात घेत आहे."

त्या म्हणाल्या, "मुख्यमंत्री उद्धव ठाकरे यांचा प्रशासनावर वचक आहे. ते ९९.९९ टक्के प्रश्न सोडविण्यासाठी कटिबद्ध असून, दिवाळीपूर्वी पुरग्रस्तांना मदत निधी पोचवण्याचे काम सुरू आहे. असे असले तरी केंद्राची भूमिका मात्र कर्मठ आहे. त्यांचे श्रेय घेण्याचे प्रयत्न आहेत. राज्य सरकार किती संवेदनशील आहे, याची जाणीव जनतेला आहे. त्याची दखल जनता नक्कीच घेईल."