मुंबई : राज्याच्या उत्पन्नवाढीबरोबरच रोजगार निर्मितीसाठी गडचिरोली जिल्ह्यातील देसाईगंज, नगर जिल्ह्यातील लिंगदेव, अकोले, नाशिक जिल्ह्यातील कळवण-सुरगाणा, जांबुटके तसेच अमरावती जिल्ह्यातील वरुड येथे ‘एमआयडीसी’ उभारण्यासाठी प्रस्ताव तातडीने सादर करावेत.

तसेच राज्यात यापुढे नवीन ‘एमआयडीसी’ उभारण्यासाठी किमान शंभर एकर जमिनीची उपलब्धता करून देण्याचे निर्देश उपमुख्यमंत्री अजित पवार यांनी दिले.

पुणे जिल्ह्यातील डुंबरवाडी (ता. जुन्नर) येथे राज्यासह केंद्राच्या विविध योजनांच्या माध्यमातून फूड प्रोसेसिंग पार्क उभारण्यासाठी राज्य शासन सकारात्मक असल्याचेही अजित पवार यांनी सांगितले. पवार यांच्या अध्यक्षतेखाली ‘एमआयडीसी’ची आढावा बैठक आयोजित करण्यात आली होती.

उद्योगमंत्री उदय सामंत, अन्न व औषध प्रशासन मंत्री धर्मरावबाबा अत्राम, नियोजन विभागाचे अपर मुख्य सचिव राजगोपाल देवरा, एमआयडीसीचे मुख्य कार्यकारी अधिकारी डॉ. विपिन शर्मा आदी यावेळी उपस्थित होते.