पुणे : संसद भवनाच्या नव्या इमरतीच्या उद्घाटन सोहळ्यावरून वाद रंगलेला असताना विरोधी पक्षांनी उद्घाटन सोहळ्यावर बहिष्कार घातला आहे. विरोधकांच्या भूमिकेला राष्ट्रवादी काँग्रेसचे अध्यक्ष शरद पवार यांनी पाठिंबा देत " संस्थेची नवी इमारत बांधली जाणार असल्याचे मी वृत्तपत्रांमध्येच वाचले होते. ही इमारत बांधताना कोणाला विश्वासात घेतले नाही," अशी टीका पवार यांनी केंद्र सरकारवर केली.

पंतप्रधान नरेंद्र मोदी यांच्या हस्ते रविवारी नव्या संसद भवनाचे उद्घाटन होत आहे. नरेंद्र मोदी यांच्या ऐवजी राष्ट्रपती द्रोपदी मुर्मू यांच्या हस्ते उद्घाटन करावे अशी मागणी विरोधी पक्षांनी करत मोदी सरकारवर टीका केलेली आहे.तसेच या कार्यक्रमावर बहिष्कार टाकलेला आहे. त्याबाबत शरद पवार यांनी आज पुण्यात त्यांची भूमिका स्पष्ट केली.

शरद पवार म्हणाले, “अनेक वर्षापासून मी संसदेचा सदस्य आहे. संसदेची नवी इमारत बांधली जाणार हे आम्ही वर्तमानपत्रात वाचलं. असा महत्वाचा निर्णय घेताना संसदेच्या सदस्यांना विश्वासात घेण्याची गरज होती. भूमिपूजन करतानाही कोणाला विश्वासात घेतलं नाही. आता इमारत तयार झाली आहे.”

संसदेची सुरूवात राष्ट्रपतींच्या उपस्थितीने होते. पण, राष्ट्रपतींनी संसदेचं उद्घाटन करावं, हे सुद्धा मान्य करण्यात आलं नाही. त्यामुळे कोणाला विश्वासात न घेताच सर्व निर्णय घ्यायचे असतील, तर विरोधी पक्षातील काही ज्येष्ठ सहकाऱ्यांनी आपण संसदेच्या उद्घाटनाला जाऊ नये अशी भूमिका मांडली. त्या भूमिकेला माझा पाठिंबा आहे,” असं शरद पवारांनी सांगितलं.

आमदारांच्या अपात्र बाबत विधानसभेच्या अध्यक्ष राहुल नार्वेकर यांनी निवडणूक आयोगाकडून शिवसेना पक्षाची घटना मागवली आहे याबाबत विचारले असता "याचा अर्थ असा, की निर्णय घेण्याची प्रक्रिया सुरू झाली आहे. अंतिम निर्णय आल्यावर प्रतिक्रिया देणं योग्य होईल,” असं शरद पवारांनी स्पष्ट केलं.