दारू वरची एक्साईज ड्युटी पन्नास टक्कें कमी करण्याचं कारण आत्ता समजलं. ठाकरे सरकारचे प्रमुख नेते डान्स करतायत. यांना महाराष्ट्राचं काही घेण देण नाही असा निशाणा शिवसेना खासदार संजय राऊत आणि राष्ट्रवादीच्या खासदार सुप्रिया सुळे (Supriya Sule)यांच्यावर भाजप नेते निलेश राणे (Nilesh Rane)यांनी ट्विट करत लगावला. खासदार संजय राऊत (Sanjay Raut)यांच्या मुलीचं लग्न सोमवारी आहे. लग्नाआधीचे विधी आणि संगीत कार्यक्रम पवईतील रेनेसा या सेव्हन स्टार हॉटेलमध्ये होते. याठिकाणी सुप्रिया सुळे आणि संजय राऊत यांनी संगीत कार्यक्रमात डान्सचा करत असलेला व्हिडिओ व्हायरल झाला. यावरून राणे यांनी टिका केली आहे.

पूर्वशी आणि मल्हार यांच्या लग्नसोहळ्यानिमित्त आयोजित संगीत कार्यक्रमात दिग्गज नेत्यांनी हजेरी लावली होती. यावेळी खासदार सुप्रिया सुळे याही त्या कार्यक्रमाला उपस्थित होत्या. त्याचे फोटो आणि भन्नाट डान्सचा व्हिडिओ सोशल मिडियावर प्रचंड व्हायरल झाला.

दरम्यान, निलेश राणे यांनी यावर टिका केली आहे. ते म्हणाले, दोन वर्षात महाराष्ट्राचं वाटोळं करणारं सरकार कसं जनतेच्या छातीवर नाचतं याचं उदाहरण हा व्हिडिओ आहे. या नेत्यांना सर्वसामान्य नागरीकांचे काही देणे घेणे नाही . दारू वरची एक्साईज ड्युटी 50% कमी करण्याचं कारण आत्ता समजलं. शेतकरी, कामगार देशोधडीला लागले आणि ठाकरे सरकारचे प्रमुख नेते डान्स करतायत. असे ते म्हणाले.