सिंधुदुर्ग : शिवसेना (Shivsena) कार्यकर्ते संतोष परब हल्ला प्रकरणी सिंधुदुर्ग जिल्हा न्यायालयाच्या आवारात हुज्जत घातल्या प्रकरणी भाजपचे (BJP) निलेश राणे (Nilesh Rane) यांच्यासह भाजपच्या अन्य पाच जणांवर ओरोस पोलिस स्थानकात रात्री उशिरा गुन्हा दाखल करण्यात आला. निलेश राणे यांच्यावर गुन्हा दाखल करण्याच्या मागणीसाठी शिवसेना आमदार वैभव नाईक (Shivsena MLA Vaibhhav Naik)यांनी जिल्हा पोलिस अधीक्षकांना पत्र पाठवले होते. निलेश राणेंवर गुन्हा दाखल झाल्यानंतर खासदार विनायक राऊत (Vinayak Raut)यांनी प्रतिक्रिया दिली आहे.

विनायक राऊत म्हणाले, सिंधुदुर्ग जिल्हा न्यायालयाच्या आवारात स्वाभिमान पक्षाच्या लोकांकडून धुडगूस घातला गेला ते योग्य नाही. न्यायालयाचं पावित्र्य राखले पाहीजे. त्यावर पोलिसांनी केलेली कारवाई योग्यच आहे. अशी प्रतिक्रिया खासदार विनायक राऊत यांनी दिली आहे.

दरम्यान, मुंबईमध्ये पेगॅसस प्रकरणाच्या मुद्यावरून भाजप-काँग्रेसमध्ये राडा झाला आहे. याविषयी बोलताना राऊत म्हणाले, मुंबई महापालिका पुर्नरचना संदर्भात आक्षेप घ्यायचा असेल तर घ्यावा. कामकाज आटोपून घेणे हे सरकारचं धोरण आहे.पेगॅससवर चर्चा झाली पाहिजे. राज्य सरकारच्या वाईन निर्णयावर राज्यभर गोंधळ सुरु असताना खासदार जलील यांच्यावर निशाणा साधत राऊत म्हणाले, वाईनच्या माध्यमातून नवे मार्केट उपलब्ध होत असेल तर तो निर्णय योग्य आहे. खासदार जलील यांना कांगावा करणं माहिती आहे असेही ते म्हणाले.

न्यायालयाच्या आवारात का झाला गोंधळ

सिंधुदुर्ग जिल्हा न्यायालयानं नितेश राणेंचा जामीन फेटाळला. तसेच संतोष परब हल्लाप्रकरणी नितेश राणेंना अटक करण्यासाठी पोलिसांनी आधीच फिल्डींग लावली होती. न्यायालयानं जामीन फेटाळताच पोलिसांनी राणेंच्या गाडीला घेराव घातला. पण, तुम्हाला गाडी थांबवण्याचे आदेश कोणी दिले, असा सवाल करत निलेश राणे चांगलेच आक्रमक झाले होते. तुम्ही सर्वोच्च न्यायालयाच्या आदेशाचे उल्लंघन करत आहात. आधी आदेश दाखवा आणि गाडी थांबवा, असं निलेश राणे म्हणाले होते.