मुंबई : शिवसेनेचे खासदार संजय राऊत यांना काल रात्री उशीरा ईडीने अटक केल्यावर अनेकांनी भाजपवर निशाणा साधला आहे. त्यानंतर भाजप नेत्यांनीही ईडी कशी बरोबर आहे हे जीव तोडून सांगितलं आहे. त्यानंतर आता भाजपचे आमदार नितेश राणे यांनी एक ट्वीट करून पुन्हा शिवसेनेला डिवचलं आहे.

(Nitesh Rane Twit)

"आता वेळ आली..." (It's Time) असं लिहित नितेश राणे यांनी शिवसेनेचे नेते अनिल परब यांचा फोटो ट्वीट केला आहे. त्यामुळे ईडीची पुढील धाड अनिल परबांवर असेल का? अशा चर्चा सुरू झाल्या आहेत. दरम्यान, नितेश राणे यांच्या ट्वीटनंतर भाजपच्या नेत्यांना ईडीची पुढची धाड कुणावर पडणार हे कसं काय माहिती आहे? अशा चर्चा होऊ लागल्या आहेत.

संजय राऊत यांच्यावर कारवाई करत ईडीने त्यांना अटक केली आहे. त्यानंतर भाजप सूडाचं राजकारण करत केंद्रीय तपास यंत्रणांचा वापर करून विरोधकांचा आवाज दाबण्याचा प्रयत्न करत आहे असा आरोप शिवसेना पक्षप्रमुख उद्धव ठाकरे यांनी केला आहे. त्यानंतर मला राऊतांचा अभिमान आहे, ते माझे जुने मित्र आहेत असंही उद्धव ठाकरे म्हणाले.

दरम्यान, शिवसेनेचे नेते अनिल परब यांच्या घरीही ईडीने धाड टाकली होती. काही दिवसांपूर्वी परबांच्या संबंधित दहा ठिकाणी धाडी टाकल्या होत्या. त्यामुळे तेही ईडीच्या रडारवर असल्याचं पहायला मिळालं होतं. पण आता राऊतानंतर अनिल परब यांचा नंबर अशा नितेश राणेंच्या ट्वीटनंतर उलटसुलट चर्चा सुरू झाल्या आहेत.