पुणे : केंद्रीय रस्ते वाहतूक मंत्री नितीन गडकरी हे आपल्या कामामुळे नेहमीच ओळखले जातात. परंतु, सध्या पावसामुळे त्यांचे खाते असलेल्ला रस्त्यांची परिस्थिती ही अत्यंत बिकट झालेली पाहायला मिळत आहे. यासंबधीची राष्ट्रवादी युवक काँग्रेसचे कार्यकर्ते आशिष मेटे यांनी औरंगाबाद-जळगाव महामार्गाची दुर्दशा दाखविणारा फोटो गडकरींना ट्विट केला होता. त्यावर नितीन गडकरी यांनी स्वतः उत्तर देत खराब रस्त्यासाठी जबाबदार असलेल्या अधिकारी आणि कंत्राटदाराला सोडणार नसल्याचे सांगितले आहे.

गडकरी प्रशासनातील कामचुकार अधिकारी असो वा भ्रष्टाचारी कंत्राटदार चुकीच्या कामांसाठी ते कुणालाही सोडत नाहीत. परंतु त्यांनी थेट विरोधी बाकावरील राष्ट्रवादी काँग्रेस पक्षाच्या एका सामान्य कार्यकर्त्याला दिलेल्या उत्तरामुळे हा एक चर्चेचा विषय बनला आहे.
 

दरम्यान, औरंगाबाद–जळगाव महामार्गावर पावसामुळे चिखलाचे साम्राज्य पसरले आहे. या रस्त्यावर एक एसटी बस चिखलात रुतून बसल्याचा फोटो काही दिवसांपासून व्हायरल होत होता. हा फोटो आशिष मेटे यांनी ट्विट करत गेल्या चार वर्षांपासून या अशा रस्त्यावर जनता जीव मुठीत घेऊन प्रवास करत आहे, तसेच इथे अनेक अपघात घडल्याचे म्हटले. केंद्रीय मंत्री नितीन गडकरी यांनी याप्रकरणी लक्ष घालावे, अशी मागणी मेटे यांनी केली होती. या मागणीला गडकरी यांनी तात्काळ उत्तर दिले.

गडकरी म्हणाले की, औरंगाबाद-सिल्लोड-जळगाव महामार्गाची दुरवस्था माझ्या निदर्शनास आली आहे. सार्वजनिक बांधकाम खात्याच्या संबंधित मुख्य अभियंत्यांना याबाबत माहिती दिली असून आठ दिवसांच्या आत या रस्त्याची दुरुस्ती करण्याच्या सूचना दिल्या आहेत. जर वेळेत काम केले नाही तर अधिकारी आणि कंत्राटदार यांना त्याचे परिणाम भोगावे लागतील, अशी तंबी गडकरी यांनी ट्विटद्वारे दिली आहे. गडकरींच्या रिप्लायनंतर आशिष मेटे यांनी गडकरी यांचे आभार मानले आहेत.