मुंबई : ठाणे जिल्ह्यातील मौजे वेहळोली वगळता अन्यत्र कुठेही बर्ड फ्लूची लागण झालेली नाही, अशी माहिती पशुसंवर्धन आयुक्तालयाने दिली आहे. बर्ड फ्लूचा प्रार्दूभाव झाल्याच्या पार्श्वभूमीवर या परिसरातील 1 कि.मी. त्रिज्येतील क्षेत्र संसर्गक्षेत्र म्हणून घोषित करण्यात आले आहे. दरम्यान, संसर्ग रोखण्यासाठी प्रशासनामार्फत आवश्यकत्या उपाययोजना केल्या जात असून, नागरिकांनी घाबरुन जावू नये, असे आवाहन पशुसंवर्धन आयुक्तालयाकडून करण्यात आले आहे. (Bird Flu Infection In Thane District )

प्रादुर्भाव असलेले ठिकाण संसर्गग्रस्त क्षेत्र घोषित

दरम्यान, प्रादुर्भाव झालेल्या ठिकाणाला संसर्गग्रस्त क्षेत्र म्हणून घोषित करण्यात आले आहे. तसेच बर्ड फ्लू चा (Bird Flu) प्रादुर्भाव आढळून आलेल्या ठिकाणापासून 1 किमी त्रिज्येच्या अंतरामध्ये येणारे सर्व कुक्कुट पक्षी नष्ट करण्याची कार्यवाही सुरु करण्यात आली आहे. आतापर्यंत बाधित क्षेत्रामधून पथकाच्या देखरेखीखाली २३,४२८ कुक्कुट पक्षी, १,६०३ अंडी, ३,८०० किलो खाद्य आणि १०० किलो शेल ग्रीट नष्ट करण्यात आले आहेत.

राज्यातील कोणत्याही गावांमध्ये कावळे, पोपट, बगळे किंवा स्थलांतरीत होणा-या पक्षांमध्ये मर्तृक झाल्याचे आढळून आल्यास किंवा व्यावसायीक पोल्ट्री फार्म मधील पक्षांमध्ये नेहमी पेक्षा जास्त प्रमाणात मर्तृक झाल्याचे निदर्शनास आल्यास तात्काळ नजिकच्या पशुवैदयकिय दवाखान्यामध्ये याची माहिती दयावी. तसेच पशुसंवर्धन आयुक्तालयाच्या टोल फ्री दुरध्वनी क्रमांक १८००२३३०४१८ तसेच पशुसंवर्धन आयुक्तालयातील कॉल सेंटर क्र. १९६२ वर त्वरीत दूरध्वनी करुन त्याची माहिती द्यावी, असे आवाहन करण्यात आले आहे.