सोलापूर : राज्यातील मुंबई, ठाणे, पुणे, रायगड, मीरा -भाईंदर या ठिकाणी कोरोनाचा वेग पुन्हा वाढू लागला आहे. तीन लाटा येऊन गेल्यानंतरही राज्यातील एक कोटी नऊ लाख व्यक्तींनी अद्याप लशीचा एकही डोस घेतलेला नाही तर पावणेतीन कोटी व्यक्तींनी अजूनही दुसरा डोस घेतलेला नाही. त्यात १२ ते १८ वयोगटातील सर्वाधिक तरुण असल्याची बाब समोर आली आहे. त्यांना सात दिवसांची मुदत दिली आहे.

कोरोनाचा प्रादुर्भाव कमी झाल्यानंतर नागरिकांनी ना मास्क वापरला ना लस घेतली. राज्यातील सोलापूर, औरंगाबाद, अमरावती, नगर, उस्मानाबाद, वाशीम, जालना, यवतमाळ, लातूर, बुलडाणा, परभणी, धुळे, अकोला, हिंगोली, नांदेड, बीड, नंदुरबार या जिल्ह्यांमध्ये अजूनही ३० ते ४८ टक्के व्यक्तींनी दुसरा डोस घेतलेला नाही. १२ ते १४ वर्षे वयोगटातील १७ लाख, १५ ते १८ वर्षे वयोगटातील २१ लाख तरुणांनी आणि १८ वर्षांवरील ७० लाख व्यक्तींनी लसीचा एकही डोस घेतलेला नाही.

रुग्णांमध्ये सौम्य लक्षणे

राज्यात चार दिवसांत आढळलेल्या कोरोनारुग्णांत नवीन व्हायरसची लक्षणे आहेत. त्यातील ८० टक्के रुग्णांवर घरी उपचार सुरु आहेत. रुग्णालयातील बहुतेकांना तीव्र लक्षणे नाहीत, अशी माहिती आरोग्य संचालक डॉ. नितीन आंबाडेकर यांनी दिली.

रुग्णवाढीचा अंदाज घेऊन संबंधित ठिकाणी काही प्रमाणात निर्बंध लागू होतील. सर्वांनी मास्क वापरणे प्रतिबंधित लस घेणे यावर विशेष लक्ष दिले जात आहे.

- डॉ. संजय ओक, अध्यक्ष, कृती दल