पुणे - पुणे शहर पोलिस आयुक्तालयाच्या वतीने येत्या ७ ते १३ जानेवारी या कालावधीत ३३ व्या महाराष्ट्र राज्य पोलिस क्रीडा स्पर्धेचे आयोजन करण्यात आले आहे. या स्पर्धेत महाराष्ट्र पोलिस दलातील राष्ट्रीय- आंतरराष्ट्रीय खेळाडूंसह सुमारे पावणेतीन हजार स्पर्धक सहभागी होणार आहेत, अशी माहिती पोलिस आयुक्त रितेश कुमार यांनी शुक्रवारी दिली.

या पत्रकार परिषदेस अतिरिक्त पोलिस महासंचालक (प्रशासन) अनुप कुमार सिंह यांच्यासह पोलिस सह आयुक्त संदीप कर्णिक, अतिरिक्त आयुक्त डॉ. जालिंदर सुपेकर, रामनाथ पोकळे, राजेंद्र डहाळे, दीपक साकोरे या वेळी उपस्थित होते.

ही स्पर्धा राज्य राखीव पोलिस बल गट क्रमांक-१ आणि गट- २ याठिकाणी होणार आहे. स्पर्धेचे उद्घाटन ११ जानेवारी रोजी दुपारी ४ वाजता मुख्यमंत्री एकनाथ शिंदे यांच्या हस्ते होणार आहे. तर, १३ जानेवारी रोजी सायंकाळी उपमुख्यमंत्री देवेंद्र फडणवीस यांच्या उपस्थितीत समारोप होणार आहे. यादिवशी पोलिस अधिकाऱ्यांच्या पत्नीसाठी फायरिंग स्पर्धा आयोजित करण्यात आली आहे.

स्पर्धेच्या आयोजनासाठी विविध समित्या गठित करण्यात आल्या आहेत. या स्पर्धेत १८ प्रकारच्या क्रीडा प्रकारांचा समावेश आहे. राज्यातून १३ संघ खेळणार असून, दोन हजार ८३३ पुरूष-महिला स्पर्धक सहभागी होणार आहेत. या स्पर्धेत पुणे आणि पिंपरी-चिंचवड पोलिस आयुक्तालय यांचा एकच संघ राहणार आहे.

स्पर्धेसाठी येणाऱ्या खेळाडू आणि संघ व्यवस्थापक, वैद्यकीय अधिकारी-कर्मचाऱ्यांसह इतर पदाधिकाऱ्यांची शहरात खासगी, शासकीय ठिकाणी निवास आणि भोजन व्यवस्था करण्यात आली आहे. प्रत्येक संघाला निवासस्थानापासून स्पर्धेच्या ठिकाणी जाण्यासाठी वाहतूक व्यवस्था करण्यात आली आहे, अशी माहिती पोलिस आयुक्त रितेश कुमार यांनी दिली.