उद्धव ठाकरे यांना पाठिंबा देत असल्याची अनेक शपथपत्र मुंबईत एकाच ठिकाणी आढळून आली होती. त्यानंतर शिंदे गटाकडून ही सर्व शपथपत्रे बनावट असल्याचा आरोप करण्यात आला होता. या प्रकरणी निर्मल नगर पोलीस ठाण्यात गुन्हा दाखल करण्यात आला होता. त्यानंतर आता हे प्रकरण आता गुन्हे शाखेकडे (क्राईम ब्रांच) वर्ग करण्यात आले आहे. सध्या राज्याच्या राजकारणात चालू असलेल्या घटनामुळे हा वाद चिघळण्याची शक्यता आहे.

स्टॅम्प पेपरचा वापर करुन ही शपथपत्र बनवण्यात आली होती. ठाण्याचे माजी महापौर नरेश म्हस्के यांनी याबाबत एका व्हिडीओतून आरोपसुद्धा केला होता. मात्र, आता गुन्हे शाखेच्या तपासातून या शपथपत्रांबाबत नेमका काय खुलासा होतो, याकडे सगळ्यांचं लक्ष लागून राहिलं आहे. नोटरी करण्यांनीच शपथपत्र बनवल्याचे समोर आले आहे. त्यानंतर एकच खळबळ उडाली.

एकूण 4 हजार 682 बनावट शपथपत्र एकाच ठिकाणी आढळून आली असून याप्रकरणी गंभीर स्वरुपाची कायदेशी कारवाई केली जावी, अशी मागणी नरेश म्हस्के यांनी केली होती. शिंदे गटाचे नेते नरेश म्हस्के यांनी याबाबत गंभीर आरोप उद्धव ठाकरे गटावर केला होता.

एकनाथ शिंदे यांच्या बंडखोरीनंतर संपूर्ण शिवसेना वेगळी झाली. त्यानंतर उद्धव ठाकरे यांनी शपथपत्रांची मोहीम राबवली. आम्ही निष्ठावंत, आम्ही उद्धव ठाकरेंसोबत, असा आशय असणारी शपथपत्र शिवसैनिकांकडून गोळा केली जात होती. दरम्यान, त्यातील 4 हजार पेक्षा जास्त शपथपत्रांबाबत आता शंका घेतली जात आहे.