ज्येष्ठ निरूपणकार पद्मश्री डॉ. अाप्पासाहेब धर्माधिकारी यांना ‘महाराष्ट्रभूषण’ याने सन्मानित करण्यात आले. मुंबईतील खारघर येथील आंतरराष्ट्रीय कॉर्पोरेट मैदानावर हा सोहळा पार पडला. (Padmashri Appasaheb Dharmadhikari was honored Maharashtra Bhushan Award 2023 )

श्रीरामाची प्रतिमा देऊन डॉ. आप्पासाहेब धर्माधिकारी यांचे स्वागत करण्यात आले. त्यानंतर केंद्रीय गृहमंत्री अमित शाह यांच्या हस्ते डॉ. अाप्पासाहेब धर्माधिकारी यांना ‘महाराष्ट्रभूषण’ पुरस्कार प्रदान करण्यात आला. यावेळी त्यांनी शाल मानपत्र, २५ लाख रुपयांचा धनादेश, सन्मानचिन्ह देत हा पुरस्कार प्रदान करण्यात आला.

या पुरस्कार सोहळ्यासाठी केंद्रीय गृहमंत्री अमित शाह, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि सांस्कृतिक कार्यमंत्री सुधीर मुनगंटीवार यांच्यासह अनेक नेतेमंडळींनी हजेरी लावली होती. यासोबतच हा अभूतपूर्व सोहळा याची देही, याची डोळा पाहण्यासाठी लाखो अनुयायांनी उपस्थिती लावली होती.

या कार्यक्रमस्थळी धर्माधिकारी यांचे श्री सदस्यांनी मोठी गर्दी केली आहे. जवळपास 20 लाख भाविक याठिकाणी आल्याची शक्यता वर्तवण्यात आली आहे.

बैठक चळवळीचे प्रणेते दिवंगत महाराष्ट्रभूषण नानासाहेब धर्माधिकारी यांनी दासबोधाच्या निरूपणातून समाजमनात आमूलाग्र बदल केले आहेत. समाजातील अंधव्यवस्थेवर दासबोधी विचारांच्या माध्यमातून जनजागृती करत समाजाला सकारात्मक वाटेवर घेऊन जाण्याचे काम या चळवळीतून झाले आहे.

नानासाहेब धर्माधिकारी यांची समाजपरिवर्तनाची ही धुरा त्यांचे सुपुत्र अाप्पासाहेब धर्माधिकारी यांनी कायम ठेवली आहे. त्यामुळे खारघरमध्ये होणाऱ्या महाराष्ट्रभूषण पुरस्कारासाठी आठवड्याभरापासून श्री सदस्यांकडून श्रमदान केले जात आहे. यामागे प्रत्येक काम हे देशासाठी, स्वधर्मासाठी करत असल्याची भावना श्री सदस्यांमधून व्यक्त केली जात आहे.