प्रकाश पाटील

पालघर : पालघरमधील केळवे समुद्रात बुडून नाशिक येथील तीन विद्यार्थाचा तर त्यांना वाचविण्यासाठी गेलेल्या एका स्थानिकाचा मृत्यू झाल्याची घटना गुरुवारी दुपारी घडली. तर दोन विद्यार्थ्यांना सुखरुप बाहेर काढण्यात आले आहे. नाशिकच्या विद्यार्थ्यांची सहल केळवे येथे आली असताना ही घटना घडली. (Nashik students drown at kelva Beach)

केळवे समुद्रकिनारी नाशिक येथील प्रसिद्ध अ‍ॅकेडमीतील 39 जण सहलीसाठी आले होते. यात ११ मुली, २२ मुले आणि अ‍ॅकेडमीतील शिक्षकांचा समावेश होता. दुपारी काही मुले पोहोण्यासाठी समुद्रात गेले. शिक्षकांनी त्यांना थांबवण्याचा प्रयत्नही केला. मात्र, विद्यार्थ्यांनी त्याकडे दुर्लक्ष केले. दीडच्या सुमारास यातील पाच विद्यार्थी समुद्रात बुडाले. या विद्यार्थ्यांना वाचवण्यासाठी एक स्थानिक तरुण समुद्रात गेला. मात्र, तो देखील बुडाला.

स्थानिक मच्छीमारांच्या मदतीने दोन जणांना सुखरुप बाहेर काढण्यात आले. तर चार जणांचा मृत्यू झाला. ओम विसपुते, दीपक वडाकाते आणि कृष्णा शेलार अशी मृत्यू झालेल्या विद्यार्थ्यांची नावे असून ते तिघेही नाशिकचे आहेत. तर केळवे येथील अथर्व नागरेचा मृत्यू झालाय.