पाली : अष्टविनायक तीर्थ क्षेत्रापैकी प्रख्यात धार्मिक स्थळ (religious place) असलेले पालीतील बल्लाळेश्वर मंदिर (Ballaleshwar Ganpati temple) गुरुवारी (ता.७) दर्शनासाठी खुले झाले. त्यानंतर रविवारी (ता.२४) आलेल्या पहिल्या संकष्टी चतुर्थीला (sankashti chaturthi) दर्शनासाठी पालीत हजारो भाविक दाखल (devotees) झाले. सकाळपासूनच दर्शनासाठी मोठ्या रांगा लागल्या होत्या.

राज्यभरातून भाविक पालीत दाखल झाले होते. गर्दी असल्याने येथील व्यावसायिकांचा धंदा तेजीत होता. बल्लाळेश्वर मंदिर परिसरात गावठी भाज्या, फळे, कंदमुळे व रानमेवा घेऊन अनेक महिला विक्रेत्या बसल्या होत्या. देवळात येणारे भाविक आवर्जून ते खरेदी करत होते. भाविकांच्या सोईसाठी बल्लाळेश्वर देवस्थान ट्रस्टच्या वतीने चोख व्यवस्था करण्यात आली होती.
पालीत दाखल झालेल्या भाविकांच्या गाड्यांमुळे वाहतूक कोंडी झाली होती.

पाली पोलिस व बल्लाळेश्वर देवस्थानचे सुरक्षा रक्षक वाहतूक कोंडी सोडविण्यासाठी प्रयत्न करत होते. दरम्यान, कोणताही अनुचित प्रकार घडू नये यादृष्टीने निरीक्षक विजय तायडे यांच्या मार्गदर्शनाखाली प्रत्येक नाक्यावर चोख पोलिस बंदोबस्त ठेवण्यात आला होता. देवळाच्या शेजारून जाणारी सर्व वाहने भक्तनिवास क्रमांक एकच्या बाजूने वळविण्यात आली होती.

"संकष्टी रविवारी आल्याने मोठ्या प्रमाणात भाविक दर्शनासाठी आले होते. खूप दिवसांनी एवढ्या मोठ्या प्रमाणात गर्दी होती. त्यामुळे व्यवसायदेखील चांगला झाला."
- अमित वरंडे, व्यावसायिक, बल्लाळेश्वर मंदिर.