मुंबईचे माजी पोलीस आयुक्त परमबीर सिंग (Parambir Singh) यांचा पगार थांबवण्याचा निर्णय राज्य सराकारने घेतला आहे. राज्याचे माजी गृहमंत्री अनिल देशमुख यांच्यावर गंभीर आरोप केल्यानंतर निर्माण झालेल्या गोंधळानंतर परमबीर सिंग यांच्यावर देखील आरोप करण्यात आले होते. ते गेल्या काही दिवसांपासून बेपत्ता होते. मुंबई पोलिसांनी त्यांच्या घराबाहेर नोटीस लाऊन त्यांना हजर राहण्यास सांगितले होते. मात्र तरीही ते हजर न राहिल्याने आता त्यांना फरार घोषित करण्याचा निर्णय घेण्यात येणार आहे.

अँटेलिया प्रकरणानंतर परमबीर सिंग यांनी अनिल देशमुख यांच्यावर भ्रष्टाचाराचे आरोप केले. त्यानंतर पूढच्या काळात त्यांच्यावर देखील आरोप झाले. त्यांच्यावर मुंबई आणि ठाण्यामध्ये काही गुन्हे सुद्धा दाखल झाले होते. परमबीर सिंग हे मे महिन्यात सुट्टीवर गेले होते, मात्र त्यानंतर ते अद्यापर्यंत परतलेले नाही. तसंच त्यांना त्यांच्या अनुपस्थितीबद्दल गृहविभागाला देखील काहीच कळवलेलं नाही. मुंबई पोलिसांनी त्यांच्या घरावर काही दिवसांपूर्वी नोटीस लावून त्यांना हजर राहण्यास सांगितले होतं. मात्र ते हजर राहिलेले नाहीत.

दरम्यान, अनेक गुन्हे दाखल झाल्यानंतर गेल्या महिन्याभरापासून केंद्रीय तपास यंत्रणा आणि राज्य सरकारलाही सापडत नसलेले मुंबईचे माजी पोलीस आयुक्त परमबीर सिंग यांचा अखेर ठावठिकाणा लागल्याची चर्चा आहे. ते सध्या चंदीगडमध्ये असल्याचा अंदाज आहे. परमबीर सिंग यांनी चौकशी आयोगापुढं एक प्रतिज्ञापत्र सादर केलं असून त्याला जोडलेली पॉवर ऑफ अॅटर्नी ही चंदीगड शहरात तयार करण्यात आली असल्याचं समोर आलं आहे.