मुंबई : राज्यातील महाविकास आघाडी सरकारने (Mahavikas Aghadi Government) सत्तेत दोन वर्ष पूर्ण केली आहेत. मुख्यमंत्री उद्धव ठाकरेंच्या (CM Uddhav Thackeray) नेतृत्वात हे सरकार काम करत आहे. पण, गेल्या दोन वर्षांपासून सातत्याने दावा केला जातोय, की राज्यात मध्यावती निवडणुका लागतील. याबाबत 'सकाळ-साम' (Sakal Saam Survey) मिळून एक सर्वेक्षण केलंय.

काही दिवसांपूर्वी देवेंद्र फडणवीसांनी अजूनही मलाच मुख्यमंत्री असल्यासारखं वाटतंय, असं वक्तव्य केलं होतं. मग खरंच निवडणुका लागल्या तर जनतेच्या मनातील मुख्यमंत्री कोण असेल? असा प्रश्न उपस्थित होतो. सकाळ-सामने केलेल्या सर्वेक्षणातून निकाल समोर आले आहेत.

राज्यभरात सर्व २८८ विधानसभा मतदारसंघातून सॅम्पल सर्व्हे करण्यात आला. याशिवाय २८८ मतदारसंघात गट चर्चाही घेण्यात आल्या आहेत. तसेच या सर्व्हेसाठी २०१९ मध्ये झालेल्या महाराष्ट्र विधानसभा निवडणुकीसाठी मतदान केलेल्या मतदारांची निवड करण्यात आली. हे सॅम्पल निवडताना शहर, ग्रामीण आणि निमशहरी असा समतोल राखला असून महापालिका हद्दीतूनही सॅम्पल निवडण्यात आले. तसेच शिक्षण, आर्थिक, सामाजिक, लिंग, वय हे सर्व निकष लक्षात घेऊन हा सर्व्हे करण्यात आला.

कोण आहे जनतेच्या मनातील मुख्यमंत्री? -

सर्वेक्षण करताना जनतेच्या मनातील मुख्यमंत्री कोण? असा प्रश्न विचारला असता, जनतेचे कौल पहिल्यांदाच मुख्यमंत्रिपदी बसलेल्या उद्धव ठाकरेंना आहेत असं दिसतंय. उद्धव ठाकरे हे मुख्यमंत्रिपदी बसलेले ठाकरे कुटुंबातील पहिली व्यक्ती आहेत. ते थेट मुख्यमंत्री झाले आणि जनतेच्या मनात त्यांनी विशेषतः कोरोना काळात चांगले स्थान मिळविल्याचे दिसतेय. २९.७ टक्के लोकांनी त्यांना पसंती दिली आहे. दुसऱ्या क्रमांकावर देवेंद्र फडणवीसांना पसंती दिली. त्यांना २२.४ टक्के लोकांनी पसंती दर्शविली आहे. भाजपला मिळालेला एकूण कौल सकारात्मक असणे आणि विरोधी पक्षनेते म्हणून कामगिरीबद्दल असमाधानी असतानाही फडणवीस यांच्या मुख्यमंत्रिपदाबद्दल सर्वसाधारण सकारात्मकता आहे.