सोलापूर : उजनी धरण ओव्हरप्लो झाले असून सध्या दौंडवरून उजनीत 70 हजार क्युसेकने आवक आहे. त्यामुळे उजनीतून भीमा नदीत 71 हजार क्युसेक विसर्ग सुरू करण्यात आला आहे. त्यामुळे भीमा नदी काठावरील नागरिकांना उजनी धरण व्यवस्थापन विभागाने सतर्कतेचा इशारा दिला आहे.

धरणाच्या पाणलोट क्षेत्रात पाऊस सुरू असून दौंडवरून उजनी धरणात मोठा विसर्ग जमा होत आहे. त्याअनुषंगाने धरणातील उपयुक्त साठा क्षमतेपेक्षा जास्त होणार असल्याने नदीतून पाणी सोडले जात आहे. रविवारी (ता. २५) रात्री आठ वाजता धरणातून सोडलेला विसर्ग 50 हजारांवरून 70 हजार करण्यात आला आहे. याशिवाय धरणावरील विद्युतगृहासाठी 1600 क्युसेक पाणी सोडण्यात येत आहे. पावसाच्या प्रमाणानुसार व धरणात येणाऱ्या पाण्याची आवक कमी जास्त होण्याची शक्यता आहे. त्यामुळे नदी काठावरील नागरिकांना सतर्क राहण्याच्या सूचना उजनी धरण व्यवस्थापन विभागाने दिल्या आहेत.

वीर अन्‌ उजनीचा मिळून 1.42 लाख क्युसेकचा विसर्ग

दरम्यान, वीर धरणातूनही 71 हजार क्युसेकचा विसर्ग नदीत सोडला आहे. पुढील 20 तासांत (सोमवारी संध्याकाळी सहानंतर) तो विसर्ग आणि उजनी धरणातून सोडलेला 71 हजार क्युसेकचा तो विसर्ग उद्या पंढरपूरजवळ भीमा नदी पात्रात जमा होईल. त्यामुळे भीमा नदी काठोकाठ भरून वहाणार असल्याने नदी काठावरील नागरिकांनी याची खबरदारी घ्यावी, असे कळविण्यात आले आहे.