मालेगाव: शहरातील चंदनपूरी गेट भागातील सराफ व्यवसायीक झुंबरलाल बागुल हे दुकान बंद करून घरी परतत असतांना त्यांच्या डोळ्यात मिरची पुड फेकून लुटल्याचा प्रकार घडला. चोरट्यांनी त्यांच्याजवळील सुमारे नऊशे ग्रंम सोने चांदीचे दागिणे असा सुमारे पस्तीस लाखाचा ऐवज लुटला. शुक्रवारी (ता.१८) रात्री उशिरा हा प्रकार घडला.

प्रकारामुळे नागरिकांमध्ये खळबळ
संगमेश्वर भागातील नवनाथनगर येथे ही घटना घडली. या लुटीच्या प्रकारामुळे खळबळ उडाली आहे. चोरटे बागुल यांच्या मागावर दुकानापासून असावे असा संशय आहे. छावणी पोलिस घटनास्थळी रवाना झाले. पोलिसांचे एक पथक, चंदनपूरी गेट ते संगमेश्वर या मार्गावरील सीसीटीव्ही फुटेजची तपासणी करीत आहे. बागुल दुकानातून आपल्या कलेक्टरपट्टा भागातील घरी जात असतांना, नवनाथ नगर येथील बोळीत चोरट्यांनी डाव साधला. दोन दुचाकीवर सहा लुटारू होते. त्यांनी श्री. बागुल यांची दुचाकी अँक्टीव्हा (एमएच -41 ए- 2680) देखील लुटून नेली. अँक्टीव्हाच्या डिक्कीत सोने होते. तर चांदीची पिशवी गाडीच्या हुकला होती. रात्री उशिरापर्यंत छावणी पोलिस ठाण्यात गुन्हा दाखल करण्याचे काम सुरू होते.