मुंबई : पंजाब अँड महाराष्ट्र को-ऑपरेटिव्ह बँक म्हणजेच पीएमसी बँकेत पैसे अडकल्याचा धसका घेत एका व्यक्तीचा मृत्यू झाला आहे. पीएमसी बँकेचे खातेदार संजय गुलाटी यांना बँकेत पैसे अडकल्याच्या चिंतेने हृदयविकाराचा धक्का आला.

संजय गुलाटी मुंबई येथे पीएमसी बँकेविरोधात प्रदर्शन केल्यानंतर घरी परतले. घरी आल्यानंतर अचानक त्यांना हृदयविकाराचा धक्का आला. त्यानंतर त्यांना रुग्णालयात दाखल करण्यात आलं. मात्र, तिथे डॉक्टरांनी त्यांना मृत घोषित केलं. संजय गुलाटी हे 51 वर्षांचे होते.

दरम्यान, पीएमसी बँकेत त्यांचे 90 लाख रुपये जमा होते. वृत्तानुसार, गुलाटी यांनी जेट एअरवेजमधील नोकरी गमावली होती. त्यानंतर आता पीएमसी बँक घोटळ्यामुळे त्यांनी आयुष्यभर कमावलेली सर्व संपत्ती फसली होती. गुलाटी यांना हा धक्का सहन झाला नाही आणि त्यांचा मृत्यू झाला.

मृत्यूसाठी पीएमसी जबाबदार- 
संजय गुलाटी यांना व्यवसायासाठी पैशांची गरज होती, त्यामुळे ते गेल्या अनेक दिवसांपासून चिंतीत होते. अनेक दिवसांपासून त्यांना तोटा सहन करावा लागत होता. ते नैराश्यात होते. त्यांच्या मृत्यूसाठी पीएमसी बँक जबाबदार असल्याचा आरोप त्यांच्या कुटुंबियांनी केला आहे. भारतीय रिजर्व्ह बँकेने पीएमसी बँकेच्या बचत खातेदारांसाठी सहा महिन्यांमध्ये पैसे काढण्याची मर्यादा 25,000 रुपयांनी वाढवून 40,000 रुपये केली आहे.