मुंबई : शंभर कोटी वसुलीप्रकरणी राज्याचे माजी गृहमंत्री अनिल देशमुख (Anil Deshmukh) कोठडीत आहेत. त्यांनी जामिनासाठी न्यायालयात अर्ज (Anil Deshmukh Bail) दाखल केला होता. आज न्यायालय त्यावर निर्णय देणार आहे. आता अनिल देशमुखांना जवळपास १३५ दिवसांच्या कोठडीनंतर जामीन मिळतो, की न्यायालय पुन्हा त्यांची कोठडीत रवानगी करतेय? हे पाहणे महत्वाचे ठरणार आहे.

मुंबईचे माजी पोलिस आयुक्त परमबीर सिंह यांची उचलबांगडी केल्यानंतर त्यांनी अनिल देशमुखांवर लेटरबॉम्ब टाकला होता. देशमुखांनी पोलिस बदल्यांमध्ये घोटाळा केला असून बार मालकाकडून शंभर कोटी वसुली करण्याचे टार्गेट पोलिसांना दिले होते, असे गंभीर आरोप परमबीरसिंह यांनी केले होते. त्यानंतर अनिल देशमुख हे तपास यंत्रणांच्या रडारवर आले. त्यांच्या नागपूर, काटोल आणि मुंबईतील घरा, कार्यालयावर ईडी, सीबीआय, आयकर विभागाची छापेमारी झाली. यामध्ये काही संशयास्पद कागदपत्रं तपास यंत्रणांच्या हाती लागल्याची माहिती होती. देशमुखांना वारंवार जबाब नोंदवण्यासाठी ईडीने नोटीस बजावली. मात्र, देशमुखांनी हजेरी लावली नाही. शेवटी त्यांच्याविरोधात लूक आऊट नोटीस काढण्यात आली. त्यानंतर अनिल देशमुख १ नोव्हेंबरला स्वतः ईडी कार्यालयात हजर झाले. त्यांची दिवसभर चौकशी झाल्यानंतर त्यांना मध्यरात्री दीड वाजण्याच्या सुमारास अटक करण्यात आली. देशमुखांना न्यायालयात हजर केले असता न्यायालयाने काही ईडी कोठडी दिली. त्यानंतर त्यांची रवानगी तुरुंगात करण्यात आली.

अनिल देशमुख हे जवळपास १३५ दिवसांपासून तुरुंगात आहेत. त्यांनी जामिनासाठी विशेष न्यायालयात अर्ज केला होता. त्यावर सुनावणी घेण्यात आली. पण, ईडीने त्यांच्या जामिनाला विरोध केला आहे. देशमुखांना जामीन देऊ नये, असा युक्तीवाद ईडीने केला आहे. आज न्यायालय यावर निकाल देणार असून सर्वांचं लक्ष लागलं आहे.