मुंबई - पुणे मेट्रोच्या मार्गातील अडथळा मुंबई उच्च न्यायालयाने दूर केला आहे. डॉ. सालीम अली अभयारण्य आणि कल्याणीनगर येथून जाणाऱ्या मेट्रोच्या बांधकामावरील स्थगिती उच्च न्यायालयाने बुधवारी (ता. २०) उठवली. 

पुणे मेट्रोने मार्गातील बदलाविषयी अधिसूचना काढली नसतानाही बांधकाम सुरू असल्याबद्दल आक्षेप घेणारी जनहित याचिका उच्च न्यायालयात दाखल करण्यात आली होती. ही याचिका फेटाळण्यात आल्याने पुणे मेट्रो प्रशासनाला दिलासा मिळाला. पुण्यातील आगाखान पॅलेससमोरून मेट्रो नेता येणार नसल्याने हा मार्ग कल्याणीनगर येथून वळवण्याचा निर्णय घेतला होता.  

मेट्रोविरोधात यापूर्वी दाखल झालेल्या याचिका उच्च न्यायालयाने फेटाळल्या. त्यानंतर या परिसरात मेट्रोचे काम सुरू झाले होते. मेट्रोच्या बदललेल्या मार्गाची अधिसूचना प्रसिद्ध झाली नसल्याचे कारण देत पुन्हा याचिका करण्यात आली होती. मागील सुनावणीत न्या. सत्यरंजन धर्माधिकारी आणि न्या. रियाज छागला यांच्या खंडपीठाने पुणे मेट्रो प्रशासनाकडे विचारणा केली होती. त्यावर संबंधित अधिसूचना प्रसिद्ध झाली नसल्याची माहिती महामेट्रोच्या वतीने देण्यात आली होती. त्यामुळे या बांधकामाला उच्च न्यायालयाने मनाई केली होती. आज झालेल्या सुनावणीत उच्च न्यायालयाने मेट्रो प्रशासनाची बाजू ऐकून घेतल्यानंतर न्यायालयाने बांधकामावरील मनाई  मागे घेतली.