मुंबई - लोकसभा निवडणुकीसाठी महायुती आणि महाविकास आघाडीत अंतर्गत जागावाटपावरून धुसफूस सुरू झालेली असताना वंचित बहुजन आघाडीचे नेते ॲड. प्रकाश आंबेडकर यांनी महाविकास आघाडी आणि ‘इंडिया’ आघाडीत येण्यासाठी पुन्हा एकदा जाहीर इच्छा प्रकट केली आहे.

मात्र, महाविकास आघाडीत येण्याबरोबरच आघाडीतील चारही पक्षांना प्रत्येकी १२ अशा समान जागांचे वाटपही व्हावे, असे सूत्र देत लोकसभेच्या १२ जागा महाविकास आघाडीत मिळाव्यात असा प्रस्ताव त्यांनी महाविकास आघाडीसमोर ठेवला आहे. लोकसभेच्या ४८ जागांचे वाटप समान झाल्यास सत्तेत समान भागीदार या सूत्रामुळे आघाडीतील वादही आपोआप मिटतील, असा दावाही त्यांनी केला.

ॲड. आंबेडकर यांनी आज महाविकास आघाडीतील नेत्यांना पत्र पाठवले आहे. काँग्रेसचे राष्ट्रीय अध्यक्ष मल्लिकार्जुन खर्गे, राष्ट्रवादी काँग्रेसचे नेते शरद पवार, शिवसेनेच्या ठाकरे गटाचे प्रमुख उद्धव ठाकरे यांना पत्र पाठविल्याचे त्यांनी ‘एक्स’वरील पोस्टमध्ये सांगितले आहे.