BJP News: विधानपरिषदेत पक्षनिहाय आकडेवारीत भाजप पहिल्या क्रमांकाचा पक्ष आहे. भाजपचे २२ सदस्य असल्यानं विधानपरिषेदत हक्कभंग समितीच्या अध्यक्षपदी प्रसाद लाड यांची निवड करण्याची मागणी होत होती. अखेर विधान परिषदेच्या हक्कभंग समितीचे अध्यक्षपद प्रसाद लाड यांच्याकडे सोपवण्यात आले आहे.

आज सकाळी 11 वाजता उपसभापती निलम गोऱ्हे यांच्या दालनात पार पडलेल्या बैठकीमध्ये हा निर्णय घेण्यात आला त्यानंतर विधान परिषद हक्कभंग समितीच्या अध्यक्षपदी प्रसाद लाड यांची नियुक्ती करण्यात आली आहे.

काँग्रेसकडून भाई जगताप तर भाजप कडून प्रसाद लाड अध्यक्षपदासाठी आग्रही होते, मात्र संख्याबळानुसार भाजप सर्वात मोठा पक्ष असल्यामुळे उपसभापतींकडून हा निर्णय घेण्यात आला.

हेही वाचा - देशातले ३२ म्युच्युअल फंडांचं व्यवस्थापन आहे महिलांच्या हाती...

खासदार संजय राऊत यांच्यावर हक्कभंग प्रकरणाची टांगती तलवार कायम असून हक्कभंग नोटीसवर खुलासा सादर करण्यास मुदतवाढ देण्यात आली आहे. खासदार संजय राऊत यांना चार दिवसांत म्हणण मांडावे लागणार आहे. विधिमंडळाकडून आज पुन्हा नवी कारणे दाखवा नोटीस जारी होणार आहे.