प्रतापगडाच्या पायथ्याशी असलेल्या अफजल खान कबरीजवळील अतिक्रमण कोणत्याही क्षणी काढली जाणार आहे. यासाठी पोलीस प्रशासनाकडून जय्यत तयारी सुरू आहे. कबरीजवळ पोकलेन मशीन तैनात केली असून अनेक ठिकाणी बॅरिगेट्स लावली जात आहे. १९९० पासून या कबरीबद्दलचा वाद सुरू होता.

अफजलखानाच्या कबरीभोवती वनखात्याच्या हद्दीत काही अतिक्रमणं केली जात होती. दर्गा बांधला जात होता. अफजलखानाचं दैवतीकरण केलं जात असल्याचा आरोप १९९० सालीच केला होता. तेव्हापासून हा वाद सुरू होता. याप्रकरणी कोर्टाने २०१७ साली निर्णय देत अतिक्रमण हटवण्याचे आदेश दिले होते. मात्र त्यानंतर अद्याप कारवाई झाली होती. अखेर आज ही कारवाई होत आहे. रात्रीपासूनच गुप्तपणे या हालचालींना वेग आला होता. आता ही अतिक्रमणं पाडण्यास सुरुवात होत आहे.

१९८० ते ८५ दरम्यान, या कबरीवर अतिक्रमण व्हायला सुरुवात झाली. तिथे उरूसही भरवण्यात आला होता. त्यानंतर या कबरीचं दर्शन घेण्याची सक्तीही करण्यात येऊ लागली. यावरुन हिंदुत्ववादी संघटनांनी आवाज उठवला होता. त्यानंतर ही कबर सामान्यांसाठी बंद झाली होती. तसंच या ठिकाणी वनविभागाच्या जागी काही खोल्या बांधण्याचा प्रयत्नही करण्यात आल्याचा आरोप आहे. या खोल्यांमध्ये १९९३ च्या बॉम्बस्फोटातले आरोपी राहत असल्याचाही आरोप केला जात होता.

काल रात्रीपासूनच बाहेरील जिल्ह्यातील पोलीस बंदोबस्त मागवल्याची बातमी आल्याने रात्री अफजलखान कबरीचे अतिक्रमण पाडणार असल्याच्या चर्चांना जिल्ह्यात उधाण आले होते. दरम्यान महाबळेश्वर बाजारपेठेतून रात्री पोलीस गाडी फिरल्यामुळे अतिक्रमण प्रतापगडावरचे की बाजारपेठेतले याबाबत महाबळेश्वर करांमध्ये चर्चा सुरू झाली होती. जिल्ह्यातील विविध पोलीस ठाण्यातील पोलिसांचा बंदोबस्त वाई मध्ये बोलावण्यात आला होता. सुमारे अठराशे पोलीस काल रात्री दहा वाजेपर्यंत वाईत दाखल झाले होते. सर्व बंदोबस्तावरील पोलिसांची व्यवस्था एका मंगल कार्यालयात केली होती. त्यांनी रात्रीच प्रतापगडाकडे कूच केले आणि आज पहाटे साडेपाचच्या सुमारास अफजलखानाच्या कबरी भोवतीची अतिक्रमणे पाडण्यास सुरुवात करण्यात आली. परिसरात कडक बंदोबस्त असून, कबरीच्या परिसरातील रस्ता बंद करण्यात आलेला आहे.

आजच्या कारवाईबाबत प्रशासनाकडून अत्यंत गोपनीयता ठेवण्यात आली होती. प्रतापगडावर एवढा मोठा बंदोबस्त का तैनात करण्यात येत आहे, याविषयी काल रात्रीच अनेकांच्या मनात शंकेची पाल चुकली होती. यासंदर्भात काल रात्री सकाळने जिल्हाधिकारी रुचेश जयवंशी आणि पोलीस अधीक्षक समीर शेख यांच्याशी संपर्क साधला होता. मात्र अशा प्रकारे कोणतीही कारवाई करण्यात येणार नसल्याची माहिती त्यांनी दिली होती.