घारगाव - चांगले उत्पन्न मिळेल म्हणून संगमनेर तालुक्यातील नांदूर खंदरमाळ येथील सुरेश संपत सुपेकर या शेतकऱ्याने साडेतीन एकर कोथिंबीर केली, मात्र भाव कोसळल्याने त्यांनी कोथिंबिरीवर रोटाव्हेटर फिरवला.

सुरेश सुपेकर यांनी साडेतीन एकर क्षेत्रात दीड महिन्यापूर्वी कोथिंबीर केली. त्यासाठी एक लाख रुपयांच्या आसपास खर्च केला. सध्या कोथिंबीर काढणीस आली असताना बाजारात भाव कोसळले.

कोथिंबीर खरेदी करण्यासाठी व्यापारीदेखील धजावत नाहीत. त्यामुळे संतापून त्यांनी रोटाव्हेटर फिरवला. मध्यंतरी अनेक शेतकऱ्यांच्या कोथिंबिरीचे पैसे झाले म्हणून आम्ही साडेतीन एकर क्षेत्रात कोथिंबीर केली. मात्र, पीक काढणीसाठी आले आणि भाव कोसळले. त्यामुळे झालेला सर्व खर्च अंगलट आला आहे.