मुंबई - काश्‍मीरमधील पुलवामा येथे केंद्रीय सुरक्षा दलाच्या ताफ्यावर झालेल्या दहशतवादी हल्ल्याच्या निषेधार्थ रविवारी गोरेगावमधील दादासाहेब फाळके चित्रनगरी दोन तासांसाठी बंद ठेवण्यात आली. यापुढे पाकिस्तानी कलाकारांसोबत काम न करण्याचा निर्णय इंडियन फिल्म ऍण्ड टेलिव्हिजन डायरेक्‍टर्स असोसिएशनने (आयएफटीडीए) जाहीर केला. तसेच, पंजाबचे सांस्कृतिकमंत्री नवज्योतसिंह सिद्धू यांच्यावरही बहिष्कार टाकण्याचा निर्णय या संघटनेने घेतला आहे.

दहशतवादी हल्ल्यानंतर पहिल्यांदाच दादासाहेब फाळके चित्रनगरी बंद ठेवण्यात आली होती. अभिनेता अमिताभ बच्चन यांनी त्यांच्या चित्रपटाचे चित्रीकरण दोन तास बंद ठेवले. क्रिकेटपटू विरेंद्र सेहवाग, हरभजन सिंग, सुरेश रैना, माजी क्रिकेटपटू महंमद कैफ यांनीही जाहिरातींचे चित्रीकरण बंद ठेवून आदरांजली सभेत सहभाग घेतला.

सिद्धू यांची सोनी वाहिनीने "द कपिल शर्मा शो'मधून हकालपट्टी केली आहे. त्यानंतर आता संघटनेनेही त्यांच्यावर बहिष्कार टाकण्याचा निर्णय घेतला. पाकिस्तानी कलाकार, गायक असलेला एकही चित्रपट भारतात प्रदर्शित होऊ देणार नाही, असा इशारा संघटनेचे अध्यक्ष, सिनेनिर्माता अशोक पंडित यांनी दिला. आदरांजली सभेसाठी चित्रनगरी दुपारी 2 ते 4 या वेळेत बंद ठेवण्यात आली होती. जवानांचे बलिदान व्यर्थ जाऊ देणार नाही, अशी शपथ या वेळी घेण्यात आली.