मुंबई : आर्थिक फसवणुकीचा (Financial fraud) आरोप असलेल्या पुण्यातील बांधकाम व्यावसायिक दिपक कुलकर्णी (deepak kulkarni) अर्थात डीएसके यांच्या मेहुणीला मुंबई उच्च न्यायालयाने (Mumbai high court) आज दोन लाख रुपयांचा जातमुचलक्यावर जामीन मंजूर (bail granted) केला.

न्या रेवती मोहिते-डेरे यांच्या पुढे अनुराधा पुरंदरे यांनी केलेल्या जामीन अर्जावर सुनावणी झाली. जामीन मंजूर करताना न्यायालयाने पुरंदरे यांना त्यांचे पारपत्र न्यायालयात जमा करण्याचे आदेश दिले. तसेच तपासात सहकार्य करण्याचे आणि हजेरी लावण्याचे निर्देश दिले आहेत. माझ्या विरोधात केलेले आरोप चुकीचे आहेत, माझा या प्रकरणाशी काही संबंध नाही, असे पुरंदरे यांनी जामीन अर्जात म्हटले आहे. मागील तीन वर्षाहून अधिक काळ त्या कारागृहात होत्या. कुलकर्णी यांच्या पत्नीलाही नुकताच जामीन मंजूर झाला आहे. डीएसके अद्याप कारागृहात असून सर्वोच्च न्यायालयात जामीनासाठी अर्ज करणार आहेत.