पुणेः एमपीएससी परीक्षेचा पॅटर्न बदला परंतु आम्हांला वेळ द्या, या मागणीसाठी शेकडो विद्यार्थी रस्त्यावर उतरले आहेत. पुण्यातील नवी पेठेमध्ये विद्यार्थ्यांचं आंदोलन सुरु आहे. यातील एका आंदोलक विद्यार्थ्यांने एक कविता सादर केली. या कवितेतून त्याने थेट काळजात हात घातला. पुण्यात एमपीएससपी करणाऱ्या विद्यार्थ्यांच्या आयुष्यात काय सुरुय, ते या कवितेवरुन लक्षात येतं.

सांग MPSC अजून काय करु

सांग MPSC अजून काय करु...

म्हसोबाचं पाय धरु की मरीआईची सेवा करु

एमपीएससी तुझ्यासाठी दसरा सोडला, दिवाळी सोडली

नागपंचमीची मैनेला भेटायची शपथ मोडली

वर्षानुर्षे अभ्यास करण्याच्या नादात मैनेच्या बा नं मैनेची गाठ दुसऱ्याशी जोडली

सांग MPSC अजून काय करु...

अधिकारी व्हावं पोरगं म्हणून बा नं पुण्याला धाडलं

आईचं दागिनं, जमिनी गहाण ठेवून सावकाराचं कर्ज काढलं

इतक्यावर बाप माझा थांबला नाही... पंढरीची वारी बिरोबाला नवस करतोय

येईल माझा तहसीलदार, येईल माझा फौजदार म्हणून रोज झुरतोय

आई बिचारी भोळी.. सोमवार धरते शनिवार धरते

कधी-कधी तर नवरात्रीचं नऊ दिवस उपाशी राहाते

मागणी मात्र एकच.. आशा मात्र एकच- पोराला नोकरी लागण्याची

अन् वरमाई म्हणून पोराच्या लग्नात मिरवण्याची...

सांग MPSC अजून काय करु...

म्हसोबाचं पाय धरु की मरीआईची सेवा करु

हेही वाचाः ज्ञानेश्वरीत आहेत HR निगडित व्यवस्थापन सूत्रे...

नवीन पॅटर्न 2025 ला लागू केला तर जुन्या पद्धतीने अभ्यास करणार्‍या विद्यार्थ्यांना शेवटच्या 2 संधी मिळतील. ज्यांना नवीन पॅटर्ननुसार तयारी करायची आहे, ते 2025 साठी तयारी करतील परंतु पॅटर्न लागू करण्याची घाई झाली तर बहुतांश विद्यार्थ्यांचे नुकसान आहे. यासंदर्भात शासनाने विचार करण्याची मागणी आंदोलक विद्यार्थ्यांनी केली आहे.