Supriya Sule - ‘जेव्हा मार्केटमध्ये एखादे नाणे चालले की त्याचीच चर्चा सर्वाधिक होते. असेच काहीसे आता अजित पवारांबाबत होत आहे. ते सध्या मंत्रालयात असून प्रत्येक गोष्टींसाठी बिचाऱ्या अजितदादांवरच खापर फोडून त्यांच्यावरच चर्चा होत आहे,’ असे राष्ट्रवादी कॉंग्रेसच्या नेत्या आणि खासदार सुप्रिया सुळे यांनी मंगळवारी सांगत, अजित पवारांबाबत सुरू असलेल्या चर्चेला पूर्णविराम देण्याचा प्रयत्न केला.

वेताळ टेकडी बचाव मोहीमे अंतर्गत टेकडीची पाहणी करण्यासाठी सुळे मंगळवारी आल्या होत्या. त्‍यावेळी त्यांनी माध्यमांशी संवाद साधला. राष्ट्रवादीचे काही नेते अजित पवारांसोबत जाणार असल्याचे विचारले तेव्हा त्‍या म्हणाल्या, ‘अजित पवार हे विरोधी पक्ष नेते आहेत.

त्यामुळे हे नेते त्यांच्या सोबतच असणार. याबाबत काही व्हिडिओ असेल तर तो ही मला पाठवा, मगच मी त्यावर बोलेल. त्यामुळे केवळ सुरू असलेल्या चर्चांवर मी काहीच बोलणार नाही.’

राष्ट्रवादी पक्षातील काही आमदार नाराज असून अजित पवार भाजपशी जवळीक साधणार, या चर्चेवर त्या म्हणाल्या, ‘मी पक्षातल्या सगळ्या आमदार- खासदारांशी बोलत आहे. राष्ट्रवादी कॉंग्रेसचे अध्यक्ष शरद पवार, अजित दादा, प्रदेशाध्यक्ष जयंत पाटील हे आमदारांना, माध्यम आणि नागरिकांसाठी नेहमी उपलब्ध असतात.

त्यामुळे जर कोणी नाराज असेल, तर अर्थातच ते आतापर्यंत आमच्या कानावर आले असते. आपल्या कुटुंबातील एखादी व्‍यक्ती नाराज असते तेव्हा ती घर सोडून जात नाही. पवार साहेब नेहमी कमी बोलावे असे सांगतात. माध्यमांनी खात्री केली तर, दादा विधानभवनात काय करीत आहे, ते समजेल.’

पाच लाख दिले तर, घरातील व्यक्ती परतेल?

नवी मुंबईतील खारघरमध्ये झालेल्या डॉ. अप्पासाहेब धर्माधिकारी यांच्या महाराष्ट्र भूषण पुरस्कार सोहळ्यादरम्यान उष्माघातामुळे ११ नागरिकांचा मृत्यू झाला. याबाबत सुळे म्हणाल्या, ‘महाराष्ट्र भूषण पुरस्कार सोहळ्या दरम्यान नागरिकांच्या मृत्यूची घटना ही दुर्दैवी आहे.

तर राज्य सरकारने या मृत्यूमुखी पडलेल्यांच्या कुटुंबाला पाच लाख रुपयांची मदत जाहीर केली. पण पाच लाख रुपयांनी घरातील करता पुरुष किंवा स्त्री परत येणार नाही. त्यामुळे कुटुंबातील त्या व्यक्तीची किंमत पैशात मोजली जाऊ शकत नाही.’