Vande Bharat: दिवाळीच्या हंगामात मध्य रेल्वेच्या पाच ‘वंदे भारत’ ट्रेनना प्रवाशांनी तुफान प्रतिसाद दिला. पंधरा दिवसांत मध्य रेल्वेच्या सीएसएमटी-शिर्डी, सोलापूर, गोवा, नागपूर-बिलासपूर आणि नागपूर-इंदूर ‘वंदे भारत’ एक्स्प्रेसमधून ६८ हजार ७३६ प्रवाशांनी प्रवास केल्याची माहिती मध्य रेल्वेने दिली.

देशाच्या स्वातंत्र्याच्या अमृत महोत्सवानिमित्त देशभरात ७५ वंदे भारत एक्स्प्रेस चालविण्यात येणार आहेत. सीएसएमटी-शिर्डी, सीएसएमटी-सोलापूर, सीएसएमटी-मडगाव, नागपूर-बिलासपूर आणि नागपूर-इंदूर अशा पाचही वंदे भारत एक्स्प्रेसना प्रवाशांची पसंती मिळत आहे. दिवाळीत पाचही एक्स्प्रेसना प्रवाशांनी तुफान प्रतिसाद दिला. १ ते १५ नोव्हेंबरदरम्यान तब्बल ६८ हजार ७३६ प्रवाशांनी प्रवास केला. त्यातून मध्य रेल्वेला कोट्यवधी रुपयांचा महसूल मिळाला. सर्वाधिक पसंती मुंबई-सोलापूर आणि मुंबई-साईनगर शिर्डी वंदे भारत ट्रेनला मिळाली.

१ ते १५ नोव्हेंबरदरम्यानचे प्रवासी
- सीएसएमटी-शिर्डी ः ११,१८९ - शिर्डी-सीएसएमटी ः ८८५४
- सीएसएमटी-सोलापूर ः १३,३४० - सोलापूर-सीएसएमटी ः १३,३४०
- नागपूर - बिलासपूर ः ६४९५ - बिलासपूर-नागपूर ः ६५११
- सीएसएमटी-मडगाव ः ६३८७ - गोवा मडगाव-सीएसएमटी ः ६३२७
- नागपूर-इंदूर ः ४७२० - इंदूर-नागपूर ः ४९१३