अनेक दिवसांच्या प्रतीक्षेनंतर आज राज्याच्या अनेक भागात पावसाने हजेरी लावली आहे. त्यामुळे नागरिकांना दिलासा मिळाला आहे. हवामान विभागाने वर्तवलेल्या अंदाजानुसार सप्टेंबर महिन्याच्या सुरुवातीपासून पावसाने राज्याच्या काही भागांमध्ये हजेरी लावली आहे.

हवामान विभागाने वर्तवलेल्या अंदाजानुसार पुढील 24 तासांमध्ये राज्याच्या मराठवाडा, मध्य महाराष्ट्र आणि विजर्भात विजांसह पाऊस हजेरी लावेल. तर, मुंबईसह नवी मुंबई, ठाणे आणि पालघरमध्येही पावसाची संततधार दिसून येईल. तर राज्याच्या काही भागांमध्ये पावसाचा जोर वाढण्याचीही शक्यता हवामान विभागाने वर्तवली आहे. त्यामुळे राज्यातील शेतकऱ्यांना काहीसा दिलासा मिळाला आहे.

दरम्यान, येत्या २ ते ३ दिवसांमध्ये राज्यात पाऊस परतणार असून, पुढल्या 24 तासांसाठी सोलापूर, सांगली, कोल्हापूर, लातूर आणि सातारा या भागांमध्ये पावसाचा यलो अलर्ट देण्यात आला आहे. तर, राज्याच्या काही भागांमध्ये ताशी 40 किमी वेगाने वारे वाहणार असल्यामुळे नागरिकांना सतर्कचे आवाहन हवामान विभागाकडून करण्यात आले आहे.

तर पुणे, मुंबई शहर परिसरात रात्रीपासून पावसाने हजेरी लावली आहे. अनेक दिवसाने परतलेल्या पावसाने उकाडा काहीसा कमी झाला आहे. पुण्यात अनेक भागांमध्ये पावसाने जोरदार हजेरी लावली आहे.

पुणे शहरातील वारजे, शिवणे कात्रज, कोंढवा, स्वारगेट, तसेच सिंहगड रोड परिसरात पावसाच्या जोरदार सरी कोसळत आहे. शनिवारी पहाटेच्या सुमारास अचानक पावसाला सुरूवात झाल्याने पुणेकरांची पुरती तारांबळ उडाली. सकाळी कामावर निघालेले अनेकजण पावसामुळे अडकून पडले होते.