मुंबई : "सोशल मीडियावरील ट्रोल्सना तू ज्याप्रकारे रोखठोक उत्तर दिलंस, त्यामुळे अनेक दबलेल्या आवाजांना तू व्यक्त होण्यासाठीची हिंमत दिलीस, त्याबद्दल तुझं अभिनंदन" अशा शब्दात महाराष्ट्र नवनिर्माण सेनेचे अध्यक्ष राज ठाकरे यांनी अभिनेत्री केतकी चितळेचे अभिनंदन केले. 

केतकी चितळेवर काही दिवसांपूर्वी सोशल मीडियावरील ट्रोल्सनी अत्यंत घाणेरड्या शब्दात टीका केली होती. त्या टीकेला केतकीने एका व्हिडिओ पोस्टद्वारे अत्यंत रोखठोक उत्तर दिले होते. 

महाराष्ट्र नवनिर्माण सेनेच्या सरचिटणीस शालिनी जितेंद्र ठाकरे यांच्यासोबत केतकी चितळे आज (शुक्रवार) सकाळी राज ठाकरे यांच्या 'कृष्णकुंज' निवासस्थानी आली होती. "राज ठाकरे यांनी माझं अभिनंदन करण्यासाठी मला बोलावलं होतं," अशी प्रतिक्रिया केतकीने प्रसारमाध्यमांशी बोलताना दिली.

"सोशल मीडियावरील महिलांशी मतभेद झाल्यावर काहीजण अत्यंत घाणेरड्या शब्दांत महिलांवर टीका करतात. दुर्दैवाने, आजही महिलांच्या मतांचा, तसेच त्यांच्या वैयक्तिक प्रतिष्ठेचा आदर करण्याची वृत्ती समाजात, विशेषतः सोशल मीडियात दिसत नाही. महिलांवर बीभत्स शब्दांत टीका करणाऱ्यांना केतकीने जे रोखठोक उत्तर दिले आहे, ते निश्चितच कौतुकास्पद आहे" असे मत मनसेच्या सरचिटणीस शालिनी ठाकरे यांनी याप्रसंगी व्यक्त केले.