आज पनवेलमध्ये मनसेचा निर्धार मेळावा पार पडत आहे. यावेळी जमलेल्या कार्यकर्त्यांना संबोधित करताना मनसे अध्यक्ष राज ठाकरे यांनी अनेक विषयांवर भाष्य केलं आहे. यावेळी राज ठाकरेंनी भाजपवर टीका केली आहे.

राज ठाकरे यावेळी बोलताना म्हणाले की, 'आपल्याकडे राज्यात कोणी कुठेही जमिनी घेत आहे. आता मी तुम्हाला 2023 ची गोष्ट सांगत आहे. 2023 मध्ये गोव्यात एक कायदा करण्यात आला आहे. गोव्यात शेतजमीन सहज कोणाला मिळणार नाही. जर घेतलीच तर तिथे तुम्हाला शेतीच करावी लागणार. उद्योग, व्यावसाय करता येणार नाही. तिथे भाजपची सत्ता आहे.'

' तिथे भाजपचे मुख्यमंत्री असा कायदा करतात. तर गोव्याचे मुख्यमंत्री म्हणतात आम्ही गोव्याचा गुरगाव किंवा छत्तीसपूर होऊ देणार नाही. म्हणजे गोव्याचे मुख्यमंत्री सांगतात आम्ही उत्तरेतून येणाऱ्या लोंकाना आमच्या इथे असणारी जमिन देणार नाही हा त्याचा अर्थ, आणि जर या मुद्द्यावर राज ठाकरे बोलला, तर राज ठाकरे देशविरोधी होतो असं म्हणत राज ठाकरे यांनी भाजपवर हल्लाबोल केला आहे.

'टोल भरा आणि मरा'

समृद्धी महामार्गाला फेन्सिंग घातलेली नाही. रस्त्यावर जनावरे येत असतात, तेव्हा त्याला काय करावं. चारशे दिवस झाले रस्ता लोकांसाठी खुला करुन दिला आहे. आतापर्यंत साडेतीनशे लोक मृत्यूमुखी पडलेत. तेथे काम केलं नाही, पण टोलनाका उभा केला आहे. म्हणजे इथे टोल भरा आणि मरा, अशी परिस्थिती असल्याचं राज ठाकरे म्हणालेत.

भाजपने दुसऱ्यांचे आमदार न फोडता पक्ष उभा करायला शिकावं

या लोकांना धडा शिकवावा, घरी बसवा, निवडणुकीच्या तोंडावर अनेक घोषणा देतात. मात्र सत्तेत आल्यानंतर करु-करु करतात. अमित ठाकरे जात असताना त्यावर भाजपने टीका केली. म्हणे रस्ते बांधायला पण शिका आणि टोल उभे करायला पण शिका, मला वाटते भाजपने दुसऱ्याचे आमदार न फोडता पक्ष उभा करायाला शिकलं पाहिजे, असा टोला राज ठाकरे यांनी भाजपला लगावला.