गेल्या काही दिवसांपूर्वी आसामध्ये झालेल्या एका कथित घटनेचे पडसाद महाराष्ट्रात उमटले होते. धार्मिक स्थळ पाडल्याच्या घटनेच्या निषेधार्थ राज्यातील अमरावती (Amravati), मालेगाव आणि नांदेड सारख्या काही भागांत मोठा हिंसाचार झाला होता. या घटनेचे राज्यभरात तीव्र पडसाद उमटले होते. त्यानंतर राज ठाकरे (Raj Thackeray) यांनी देखील या घटनेवर प्रतिक्रिया दिली आहे.

राज ठाकरे हे सध्या राज्यव्यापी दौऱ्यावर असून, या दौऱ्यात त्यांनी संघटना बांधणीच्या दृष्टीने मोठ्या हालचाली सुरू केल्याचं दिसतंय. त्यातच त्यांनी केलेल्या भाषणाचा एक व्हिडिओ सध्या सोशल मिडियावर चांगलाच व्हायरल होतोय. मनसे नेते संदीप देशपांडे (Sandeep Deshpande) यांनी साहेबांचा आदेश म्हणत हा व्हिडिओ शेअर केला आहे.अमरावतीमध्ये जो प्रकार झाला, तो प्रयत्न जर पुन्हा महाराष्ट्रात झाला तर सोडायचं नाही. प्रत्येकाला आपल्या घरावरती आणि घराजवळच्या चौकावरती आपल्या पक्षाचा झेंडा लावण्यास सांगा असं आवाहन राज ठाकरे यांनी उपस्थितांना केला.

राज ठाकरे यांच्या या वक्तव्यानंतर कार्यकर्त्यांनी जय श्री रामच्या घोषणा देत त्यांच्या या भूमिकेंचं स्वागत केल्याचं दिसलं. तसेच नवीन वर्षात धूम धडाका सुरू करू असंही राज ठाकरे यावेळी म्हणाले. त्यामुळे आता आगामी काळात राज ठाकरे आपल्या हिंदुत्वादाच्या भूमिवरून आक्रमक होतील अशी शक्यता निर्माण झाली आहे.